مرزا غالب

رخصتِ نالہ مجھے دے کہ مبادا ظالم
تیرے چہرے سے ہو ظاہر غمِ پنہاں میرا
وہ میری چینِ جبیں سے غمِ پنہاں سمجھا
رازِ مکتوب بہ بے ربطی عنواں سمجھا
سب کہاں؟ کچھ لالہ و گل میں نمایاں ہو گئیں
خاک میں کیا صورتیں ہوں گی کہ پنہاں ہو گئیں!
بیکسی ہائے شبِ ہجر کی وحشت ، ہے ہے !
سایہ خورشیدِ قیامت میں ہے پنہاں مجھ سے
یا میرے زخمِ رشک کو رسوا نہ کیجیے
یا پردۂِ تبسمِ پنہاں اٹھائیے

حیدر علی آتش

دل کے آئینے میں کر جوہر پنہاں پیدا
در و دیوار سے ہو صورت جاناں پیدا
نشۂ مے میں کھلی دشمنی دوست مجھے
آب انگور نے کی آتش پنہاں پیدا

مصطفٰی خان شیفتہ

اس طرف کو بھی نگہ تا سرِ مژگاں آئی
بارے کچھ کچھ اثرِ گریۂِ پنہاں دیکھا
شکایت کو اس نے سنا بھی نہیں
کھلا غیر پر رازِ پنہاں عبث

مومن خان مومن

داغِ دل نکلیں گے تربت سے مری جوں لالہ
یہ وہ اخگر نہیں جو خاک میں پنہاں ہوں گے
پھرتے ہیں کیسے پردہ نشینوں سے منہ چھپائے
رسوا ہوئے کہ اب غمِ پنہاں نہیں رہا

خواجہ میر درد

ملاؤں کس کی آنکھوں سے میں اپنی چشمِ حیراں کو
عیاں جب ہر جگہ دیکھوں اسی کے ناز پنہاں کو

قمر جلالوی

چارہ گر کیونکر نکالے دل میں پنہاں ہو گئیں
ٹوٹ کر نوکیں ترے تیروں کی ارماں ہو گئیں
آسماں پر ڈھونڈتا ہوں ان دعاؤں کو قمر
صبح کو جو ڈوبتے تاروں میں پنہاں ہو گئیں

مجید امجد

جیتی مٹی! تیرے نام کی ٹھنڈک
میرے اک اک گرم آنسو میں پنہاں

احسان دانش

لاکھ چاہا مگر افسوس کہ آنسو نہ تھمے
ضبطِ غم مجھ سے بقدر غمِ پنہاں نہ ہوا

اختر شیرانی

آؤ بے پردہ تمہیں جلوۂ پنہاں کی قسم
ہم نہ چھیڑیں گے ہمیں زلفِ پریشاں کی قسم
ہائے وہ مایوسیوں میں میری امیدوں کا رنگ
جو ستاروں کی طرح اٹھ اٹھ کے پنہاں ہو گئیں

بیان میرٹھی

جسے سب نوح کے فرزند کہتے ہیں کہ طوفاں تھا
کسی جاندادۂ خاموش کا اندوہ پنہاں تھا
نہ کھولی آنکھ وقت نزع بیمار محبت نے
کسی کا پردہ رکھنا تھا کوئی آنکھوں میں پنہاں تھا

ضیا جالندھری

مجھ سے ملنے کے خواہاں ہو مل کر رونے سے حاصل
پھر وہ آگ بھڑک اٹھے گی اب جو راکھ میں پنہاں ہے

ظہیر کاشمیری

تو اگر غیر ہے نزدیک رگِ جاں کیوں ہے
نا شناسا ہے تو پھر محرم پنہاں کیوں ہے

جوش ملیح آبادی

ہماری زندگی کیا سلسلہ اک دل دھڑکنے کا
ہماری موت کیا جنبش ہے اک جذبات پنہاں کی
بنا دیں گی یقیں ہے جوشؔ مرد باخدا اک دن
تپش اندوزیاں سینے میں برق سوز پنہاں کی
تاچند رسم جامہ دری کی حکایتیں
تکلیف یک تبسم پنہاں تو کیجئے
یوں ڈھل گیا ہے درد میں درماں کبھی کبھی
نغمے بنے ہیں گریۂ پنہاں کبھی کبھی

سلام مچھلی شہری

مجھ کو دکھلاؤ نہ اپنی یہ ادائے جلوہ
چلو تسلیم کہ تم مجھ میں بھی پنہاں ہو ضرور

شبلی نعمانی

دوسروں پر کیا کھلے راز دہن
جب کہ خود صانع سے پنہاں رہ گیا
ضعف مرنے بھی نہیں دیتا مجھے
میں اجل سے بھی تو پنہاں رہ گیا

عزیز حامد مدنی

حرم کا آئینہ برسوں سے دھندلا بھی ہے حیراں بھی
اک افسون برہمن ہے کہ پیدا بھی ہے پنہاں بھی

فانی بدایونی

دل بھی تھا منہ سے بس اک آہ نکل جانے تک
آگ سینے میں لگا کر غمِ پنہاں نکلا

فراق گورکھپوری

عشق کی مایوسیوں میں سوزِ پنہاں کچھ نہیں
اس ہوا میں یہ چراغ زیر داماں کچھ نہیں
دیکھنی تھی دیکھ لی اس چھیڑ کی بھی سادگی
بے دلوں میں یہ تبسم ہائے پنہاں کچھ نہیں