مصحفی غلام ہمدانی

پھر دم ہے وہ شملہ جو ہوا حد سے زیادہ
رکھ شملہ تو شملے کا جو دستور ہو اے شیخ

باقی صدیقی

کوئی مختار اور کوئی مجبور
خوب ہے تیری بزم کا دستور
وضعداری بھی سیکھ لے باقیؔ
یہ بھی ہے اک جہان کا دستور

خواجہ میر درد

قتل عاشق کسی معشوق سے کچھ دور نہ تھا
پر ترے عہد سے آگے تو یہ دستور نہ تھا

قمر جلالوی

تم روز جفا و جور کرو، نالے نہ سنو، تسکین نہ دو
ہم اس دنیا میں رہتے ہیں شکووں کا جہاں دستور نہیں
شکوۂ حسن نہ کرنا دلِ رنجور کبھی
عشق والوں نے یہ بدلا نہیں دستور کبھی

بشیر بدر

اچھا تمہارے شہر کا دستور ہو گیا
جس کو گلے لگا لیا وہ دور ہو گیا

ضیا جالندھری

مشکلیں دل میں نئی شمعیں جلا دیتی ہیں
غم سے بجھ جانا تو درویشوں کا دستور نہیں

شکیل بدایونی

دل پر بیتے لب پہ نہ آئے
ہائے محبت کا دستور
بدلتی جا رہی ہے دل کی دنیا
نئے دستور ہوتے جا رہے ہیں

عزیز حامد مدنی

ہم ایسے ناکام وفا کے غول میں آ کر بیٹھے ہو
دنیا کی تقدیر بدلنا جن کا اک دستور رہا

فانی بدایونی

ارباب محبت پر تم ظلم کے بانی ہو
یہ ورنہ محبت کے دستور نہیں ہوتے

مجروح سلطان پوری

یہ محفل اہلِ دل ہے یہاں ہم سب مے کش ہم سب ساقی
تفریق کریں انسانوں میں اس بزم کا یہ دستور نہیں

ناصر کاظمی

دیکھ محبت کا دستور
تو مجھ سے میں تجھ سے دور