مصحفی غلام ہمدانی

کیا بری خو ہے مری بھی کہ بہ ایں دعوی عقل
میں بھی جاتا ہوں وہاں جانِ جہاں جاتی ہے
کیوں کہ فربہ نہ نظر آوے تری زلف کی لٹ
جونک سی یہ تو مرا خون ہی پی جاتی ہے
جسم نے روحِ رواں سے یہ کہا تربت میں
اب مجھے چھوڑ کے تنہا تو کہاں جاتی ہے
جب دیکھتی ہے دودھ سا پنڈا ترا میاں
خجلت سے آب ہی ہوئی جاتی ہے چاندنی

جون ایلیا

ایک ہی مژدہ صبح لاتی ہے
دھوپ آنگن میں پھیل جاتی ہے
فرش پر کاغذ اڑتے پھرتے ہیں
میز پر گرد جمتی جاتی ہے
آپ اپنے سے ہم سخن رہنا
ہم نشیں سانس پھول جاتی ہے
کون اس گھر کی دیکھ بھال کرے
روز اک چیز ٹوٹ جاتی ہے

عبدالحمید عدم

کشتیاں یوں بھی ڈوب جاتی ہیں
ناخدا کس لیے ڈراتے ہیں
اور تو دل کو نہیں ہے کوئی تکلیف عدمؔ
ہاں ذرا نبض کسی وقت ٹھہر جاتی ہے

اسرار الحق مجاز

یہ تیرگیِ شب ہی کچھ صبح طراز آتی
خود وعدۂ فردا کی چھاتی بھی دھڑک جاتی
یارب وہ جوانی بھی کیا محشر ارماں تھی
انگڑائی بھی جب لیتی ایک آنکھ جھپک جاتی

بیان میرٹھی

غمزۂ معشوق مشتاقوں کو دکھلاتی ہے تیغ
صورت ابرو ہمارے سر چڑھی جاتی ہے تیغ
ہوتے ہیں قرباں شہادت میں گلے مل کر شہید
دوش قاتل پر ہلال عید بن جاتی ہے تیغ
پست خم کھائے ہوئے لب خشک دم ڈوبا ہوا
چلتے چلتے اب تو او ظالم تھکی جاتی ہے تیغ
اس کی گردن پر مرا خوں اس کا احساں میرے سر
اس سے جھک جاتا ہوں میں اور مجھ سے جھک جاتی ہے تیغ
پار دریائے شہادت سے اتر جاتے ہیں سر
کشتیٔ عشاق کی ملاح بن جاتی ہے تیغ
خون گرماتا ہے جب پانی میں لہراتا ہوا
مثل ماہی خوف کے مارے اچھل جاتی ہے تیغ
ابروئے خوں خار قاتل کا کوئی پرساں نہیں
اب نکلتی ہے کہیں تو قرق ہو جاتی ہے تیغ
مرحبا جذب شہادت اس کا مغرب ہے گلو
آپ منزل پر ہلال آسا پہنچ جاتی ہے تیغ
زخم کاری نے کہیں منہ کھول کر کچھ کہہ دیا
کیا ہوا قبضہ سے باہر کیوں ہوئی جاتی ہے تیغ