مصحفی غلام ہمدانی

لاکھ پردے گر ہوں تیرے حسن پر
کوئی پردوں میں چھپا رہتا ہے تو

باقی صدیقی

اس کے غم کا علاج کیا باقیؔ
بے سبب جو اداس رہتا ہو
اپنی نظر کے دام سے نکلے نہ ہم کہیں
تصویر کا رخ ایک ہی رہتا ہے سامنے

شکیب جلالی

اتر گیا ترے دل میں تو شعر کہلایا
میں اپنی گونج تھا اور گنبدوں میں رہتا تھا

بشیر بدر

پھول سی ہر تصویر میں ذہن کی دیواروں سے اتار چکا ہوں
پھر بھی دل میں کانٹا سا کیوں رہ رہ کر چبھتا رہتا ہے

ظہیر کاشمیری

اس کٹیا کو ڈھانے والے غور سے سن
اس کٹیا میں تیرا دھیان بھی رہتا ہے
مجھ سے بچھڑ کر پہروں رویا کرتا تھا
وہ جو میرے حال پہ ہنستا رہتا ہے
ہجر و وصال کی سردی گرمی سہتا ہے
دل درویش ہے پھر بھی راضی رہتا ہے

عبید اللہ علیم

اک طبع رنگ رنگ تھی سو نذر گل ہوئی
اب یہ کہ اپنے ساتھ بھی رہتا نہیں ہوں میں

غلام محمد قاصر

گلیوں کی اداسی پوچھتی ہے گھر کا سناٹا کہتا ہے
اس شہر کا ہر رہنے والا کیوں دوسرے شہر میں رہتا ہے
پھر جسم کے منظر نامے میں سوئے ہوئے رنگ نہ جاگ اٹھیں
اس خوف سے وہ پوشاک نہیں بس خواب بدلتا رہتا ہے
ہر عہد نے زندہ غزلوں کے کتنے ہی جہاں آباد کیے
پر تجھ کو دیکھ کے سوچتا ہوں اک شعر ابھی تک رہتا ہے

ماجد صدیقی

ہوں محروم اک ایک چلن سے دنیا کے
ماجدؔ جانے میں کس جگ میں رہتا ہوں

اختر ہوشیارپوری

گھر کا دروازہ مقفل ہے اگر دیکھے کوئی
اندر اک کہرام ہے جیسے کوئی رہتا بھی ہے
میرے سرہانے کوئی بیٹھا ڈھارس دیتا رہتا ہے
نبض پہ ہاتھ بھی رکھتا ہے ٹوٹے دھاگے بھی جوڑتا ہے

ناصر کاظمی

تجھ کو لمبی تان کے سوتے
میں پہروں تکتا رہتا تھا
جب تک تجھ کو نیند نہ آتی
میں ترے پاس کھڑا رہتا تھا
میں اس شہر میں کیوں آیا تھا
میرا کون یہاں رہتا تھا
اپنی دھن میں رہتا ہوں
میں بھی تیرے جیسا ہوں