مرزا غالب

جو نہ نقد داغِ دل کی کرے شعلہ پاسبانی
تو فسردگی نہاں ہے بہ کمینِ بے زبانی
زبان اہلِ زباں میں ہے مرگِ خاموشی
یہ بات بزم میں روشن ہوئی زبانیِ شمع
کب وہ سنتا ہے کہانی میری
اور پھر وہ بھی زبانی میری
سکوت و خامشی اظہارِ حال بے زبانی ہے
کمینِ درد میں پوشیدہ راز شادمانی ہے
دے کے خط منہ دیکھتا ہے نامہ بر
کچھ تو پیغامِ زبانی اور ہے

امام بخش ناسخ

سو قصوں سے بہتر ہے کہانی مرے دل کی
سن اس کو تو اے جان زبانی مرے دل کی

حیدر علی آتش

نکلتی منہ سے قاصد کے نہیں بات
مگر لایا ہے پیغامِ زبانی
مصرع تیغ ہے ہر مصرع موزوں آتشؔ
دیکھ لی یار مری سیف زبانی تیری

شیخ ابراہیم ذوق

دل مرا بوسہ بہ پیغام نہیں ہے ہمدم
یار لیتا ہے تو لے اپنی زبانی مانگے

مصحفی غلام ہمدانی

میں بے گناہ سزا وار گالیوں کا نہیں
نہ میرے ساتھ کریں اتنی بد زبانی آپ
اس پہ پروانے گو ہجوم کریں
شمع کی وہ ہی کم زبانی ہے
تصور ہے کہاں مجھ پاس تیرا
میں خود باتیں زبانی کر رہا ہوں

سراج الدین ظفر

مری خاموش صورت آئنہ دارِ محبت ہے
میں آئینے سے حسنِ بے زبانی لے کے آیا ہوں

اختر شیرانی

آ کہ ہم بھی اک ترانہ جھوم کر گاتے چلیں
اس چمن کے طائروں کی ہم زبانی پھر کہاں

آنس معین

تیرا لہجہ اپنایا اب دل میں حسرت سی ہے
اپنی کوئی بات کبھی تو اپنی زبانی کہتے

بہزاد لکھنوی

بلبل نے تو افسانہ اپنا ہی سنایا تھا
گلشن کی کہانی تو پھولوں کی زبانی تھی
آ گیا اے سننے والے اب مجھے پاسِ وفا
اب بیاں روداد دل میری زبانی ہو چکی

فانی بدایونی

سنے جاتے نہ تھے تم سے مرے دن رات کے شکوے
کفن سرکاؤ میری بے زبانی دیکھتے جاؤٔ

احمد فراز

ہم سنائیں تو کہانی اور ہے
یار لوگوں کی زبانی اور ہے

امیر مینائی

شمع کے مانند کیا آتش زبانی پر گھمنڈ
صورتِ پروانہ کر سوز نہانی پر گھمنڈ
شمعِ محفل شامت آئی ہے تری خاموش ہو
دل جلوں کے سامنے آتش زبانی پر گھمنڈ

فراق گورکھپوری

خلق کیا کیا مجھے نہیں کہتی
کچھ سنوں میں تری زبانی بھی

ناصر کاظمی

یہاں جنگل تھے آبادی سے پہلے
سنا ہے میں نے لوگوں کی زبانی