مرزا رفیع سودا

اک وامق نو کا ہے سمجھ چاکِ گریباں
کرتی ہے جو رخنہ کوئی دیوار پرانی

عرفان صدیقی

پھر جگاتی ہے وہی ٹیس پرانی بارش
اس برس بھی ہے اسی طرح سہانی بارش

آنس معین

تبدیلی سچائی ہے اس کو مانتے لیکن کیسے
آئینے کو دیکھ کے اک تصویر پرانی کہتے

عبید اللہ علیم

جوانی کیا ہوئی اک رات کی کہانی ہوئی
بدن پرانا ہوا روح بھی پرانی ہوئی

اکبر حمیدی

گئی گزری کہانی لگ رہی ہے
مجھے ہر شے پرانی لگ رہی ہے

احمد فراز

چارہ گر روتے ہیں تازہ زخم کو
دل کی بیماری پرانی اور ہے
ہاں تازہ سانحوں کا کرے کون انتظار
ہاں دل کی واردات پرانی کوئی لکھو

اقبال ساجد

ختم راتوں رات اس گل کی کہانی ہو گئی
رنگ بوسیدہ ہوئے خوشبو پرانی ہو گئی
خوف اب آتا نہیں ہے سیپیاں چنتے ہوئے
دوستی اپنی سمندر سے پرانی ہو گئی
ساجدؔ تو پھر سے خانۂ دل میں تلاش کر
ممکن ہے کوئی یاد پرانی نکل پڑے

فراق گورکھپوری

آج بھی سن رہے ہیں قصۂ عشق
گو کہانی بہت پرانی ہے
وضع کرتے کوئی نئی دنیا
کہ یہ دنیا ہوئی پرانی بھی

ناصر کاظمی

نئی دنیا کے ہنگاموں میں ناصر
دبی جاتی ہیں آوازیں پرانی