مرزا رفیع سودا

کیجیے نہ اسیری میں اگر ضبط نفس کو
دے آگ ابھی شعلۂ آواز قفس کو
لے سکتے نہیں سانس تری کو کے مقید
تا خونِ جگر بیچ نہ غوطہ دیں نفس کو

باقی صدیقی

کیوں چھا رہی ہے بزمِ جہاں پر فسردگی
دو دن تو اور ساغر سوز نفس چلے
ہم سے بھی زمانہ آشنا ہے
ہم بھی ترے ہم نفس رہے ہیں

شکیل بدایونی

کہاں کے نالے کہاں کی آہیں جمی ہیں ان کی طرف نگاہیں
کچھ اس قدر محو یاد ہوں میں کہ فرصتِ یک نفس نہیں ہے
نہ ہوش خلوت نہ فکر محفل عیاں ہو اب کس پہ حالتِ دل
میں آپ ہی اپنا ہم نفس ہوں مرا کوئی ہم نفس نہیں ہے
کریں بھی کیا شکوۂ زمانہ کہیں بھی کیا درد کا فسانہ
جہاں میں ہیں لاکھ دشمنِ جاں کوئی مسیحا نفس نہیں ہے
کہاں وہ امید آمد آمد کہاں یہ ایفائے عہد فردا
جب اعتبار نظر نہ تھا کچھ اب اعتبار نفس نہیں ہے

شاذ تمکنت

نفس کی آمد و شد بھی ہے سانحہ کی طرح
گواہ رہ کہ ترا ہم نفس رہا ہوں میں