مرزا غالب

ایجاد کرتی ہے اسے تیرے لیے بہار
میرا رقیب ہے نفسِ عطر سائے گل

باقی صدیقی

ہم تری بزم سے بازار میں جب لائے گئے
دور تک ساتھ لپٹے ہوئے کچھ سائے گئے
ہر طرف بکھرے ہیں رنگیں سائے
راہرو کوئی نہ ٹھوکر کھائے
تجھ کو دیکھا ترے وعدے دیکھے
اونچی دیوار کے لمبے سائے

جگر مراد آبادی

جہلِ خرد نے دن یہ دکھائے
گھٹ گئے انساں بڑھ گئے سائے
کیسا مجاز اور کیسی حقیقت
اپنے ہی جلوے اپنے ہی سائے
راہ جنوں آسان ہوئی ہے
زلف و مژہ کے سائے سائے

قمر جلالوی

لحد اور حشر میں یہ فرق کم پائے نہیں جاتے
یہاں دھوپ آ نہیں سکتی وہاں سائے نہیں جاتے
فضیلت ہے یہ انساں کی وہاں تک پہنچاتا ہے
فرشتے کیا فرشتوں کے جہاں سائے نہیں جاتے

شکیب جلالی

وہاں کی روشنیوں نے بھی ظلم ڈھائے بہت
میں اس گلی میں اکیلا تھا اور سائے بہت

رئیس فروغؔ

ہمہ وقت جو مرے ساتھ ہیں یہ ابھرتے ڈوبتے سائے سے
کسی روشنی کے سراب ہیں کہ ملے ہر اپنے پرائے سے
مرے کار زار حیات میں رہے عمر بھر یہ مقابلے
کبھی سایہ دب گیا دھوپ سے کبھی دھوپ دب گئی سائے سے
در و دیوار سجائے میں نے
جیسے دیکھے نہیں سائے میں نے

احسان دانش

یہ دوپہر یہ زمیں پر لپا ہوا سورج
کہیں درخت نہ دیوار و در کے سائے ہیں

زہرا نگاہ

یہ اداسی یہ پھیلتے سائے
ہم تجھے یاد کر کے پچھتائے

غلام محمد قاصر

یہ جہاں نورد کی داستاں یہ فسانہ ڈولتے سائے کا
مرے سر بریدہ خیال ہیں کہ دھواں ہے سونی سرائے کا

حفیظ ہوشیارپوری

غمِ زمانہ تری ظلمتیں ہی کیا کم تھیں
کہ بڑھ چلے ہیں اب ان گیسوؤں کے بھی سائے

رسا چغتائی

سائے ہیں جتنے گریزاں دھوپ سے
دھوپ کو ہیں اتنے ہی سائے عزیز

خاطر غزنوی

کلی ہے مہر بہ لب پھول ہے گریباں چاک
اجل کی دھوپ ہے پھرتی ہے سائے سائے صبا

سیف الدین سیف

پھیل رہے ہیں وقت کے سائے
دیکھیں رات کہاں تک جائے

قتیل شفائی

زمانہ درد کے صحرا تک آج لے آیا
گزار کر تری زلفوں کے سائے سائے مجھے

کیف بھوپالی

طالبان دید ان کے دھوپ دھوپ پھرتے ہیں
غیر ان کے کوچے میں سائے سائے بیٹھا ہے

کیفی اعظمی

دیواریں تو ہر طرف کھڑی ہیں
کیا ہو گئے مہربان سائے

مجروح سلطان پوری

مجرم تھے جو ہم سو قید ہوئے صیاد مگر اب یہ تو بتا
ہر وقت یہ کس کو ڈھونڈتے ہیں دیوار کے سائے زنداں میں

ناصر کاظمی

یہ رینگتی چلی آتی ہیں کیا لکیریں سی
یہ ڈھونڈتی ہے کسے سائے سائے شامِ فراق