باقی صدیقی

تم زمانے کی راہ سے آئے
ورنہ سیدھا تھا راستہِ دل کا

جون ایلیا

بات ہے راستے پہ جانے کی
اور جانے کا راستہ ہی نہیں
اپنی منزل کا راستہ بھیجو
جان ہم کو وہاں بلا بھیجو

قمر جلالوی

میں اس حالت سے پہنچا حشر والے خود پکار اٹھے
کوئی فریاد والا آ رہا ہے راستہ دینا

عرفان صدیقی

یا تو اس جنگل میں نکلے چاند تیرے نام کا
یا مرا ہی لفظ میرا راستہ روشن کرے
عجب نہیں کہ یہ دریا نظر کا دھوکا ہو
عجب نہیں کہ کوئی راستہ نکل آئے
کبھی نہ ختم ہو یہ جنگلوں کی ہم سفری
میں تیرے ساتھ چلوں اور راستہ بھی نہ آئے

اختر حسین جعفری

اپنے اپنے سفر پر پھریرے چلے رات کے لشکری منہ اندھیرے چلے
پاؤں پاؤں چلا بے سپر راستہ رات ڈھلنے لگی رت بدلنے لگی

جمال احسانی

دیوار بدست راہرو تھے
کس نے کسے راستہ دیا ہے

رئیس فروغؔ

یہ کشادہ کشادہ فضا ہر طرف
اور یہ ایک ہی راستہ ہر طرف

ادا جعفری

آگے حریم غم سے کوئی راستہ نہ تھا
اچھا ہوا کہ ساتھ کسی کو لیا نہ تھا
آگے حریم غم سے کوئی راستہ نہ تھا
اچھا ہوا کہ ساتھ کسی کو لیا نہ تھا

بشیر بدر

ہم بھی دریا ہیں ہمیں اپنا ہنر معلوم ہے
جس طرف بھی چل پڑیں گے راستہ ہو جائے گا

زہرا نگاہ

ہم سے بڑھی مسافت دشتِ وفا کہ ہم
خود ہی بھٹک گئے جو کبھی راستہ ملا

سدرشن فاکر

پھر نہ آیا خیال جنت کا
جب ترے گھر کا راستہ دیکھا

غلام محمد قاصر

میں مخالف سمت میں چلتا رہا ہوں عمر بھر
اور جو اس تک گیا وہ راستہ بھی میں ہی تھا

احمد راہی

وارفتگی مری ہے کہ ہے انتہائے شوق
اس کی گلی کو لے گیا ہر راستہ مجھے

ثروت حسین

جنت ارضی بلاتی ہے تمہیں
آؤ ثروتؔ راستہ موجود ہے

رسا چغتائی

یہ دریا ہے گزر جانا ہے اس کو
مسافر ہو تم اپنا راستہ لو

سیماب اکبر آبادی

پایا تجھے حدود تعین سے ماورا
منزل سے کچھ نکل کے ترا راستہ ملا

اختر ہوشیارپوری

سواد شہر میں ملتے ہیں لوگ سنگ بدست
سواد شہر سے صحرا کو راستہ جو ہوا

احمد فراز

الفاظ تھے کہ جگنو، آواز کے سفر میں
بن جائے جنگلوں میں جس طرح راستہ سا
خود کو یوں‌ محصور کر بیٹھا ہوں اپنی ذات میں
منزلیں چاروں طرف ہیں راستہ کوئی نہیں
یہ میرے ساتھ کیسی روشنی ہے
کہ مجھ سے راستہ دیکھا نہ جائے

قیوم نظر

نقشِ کفِ پا نے گل کھلائے
ویراں کہاں اب یہ راستہ ہے
غبار کہکشاں چھٹ بھی گیا تو
کہیں لے جائے گا یہ راستہ کیا

کیفی اعظمی

خار و خس تو اٹھیں راستہ تو چلے
میں اگر تھک گیا قافلہ تو چلے