باقی صدیقی

باقیؔ دلوں میں آ گئی سڑکوں کی تیرگی
بجلی کے قمقمہوں سے اجالا نہ ہو سکا

رئیس فروغؔ

تیر ی راتوں میں سمودوں گا
جتنا بھی مجھ میں اجالا ہے
کوئی چہرہ ہے کہ اس پر میں نے
کبھی دیکھا تھا اجالا اپنا

زہرا نگاہ

بے چراغی سے تیری مرے شہرِ دل
وادی شعر میں کچھ اجالا سا تھا

ظہیر کاشمیری

ہمیں خبر ہے کہ ہم ہیں چراغ آخرِ شب
ہمارے بعد اندھیرا نہیں اجالا ہے

حسرت موہانی

کیوں نہ ہو تیری محبت سے منور جان و دل
شمع جب روشن ہوئی گھر میں اجالا کر دیا

رسا چغتائی

میں تجھے آنکھ بھر کے دیکھ سکوں
اتنا کافی ہے بس اجالا مجھے

سلام مچھلی شہری

تھوڑی دیر اے ساقی بزم میں اجالا ہے
جام خالی ہونے تک چاند ڈھلنے والا ہے
شگفتہ بچوں کا چہرہ دکھائی دینے لگے
میں کیا کروں کہ اجالا دکھائی دینے لگے

سیماب اکبر آبادی

اتفاق وقت تھا اپنا فروغ آشیاں
جب کوئی جگنو چمک اٹھا اجالا ہو گیا