باقی صدیقی

اور کس پر یہ حادثے گزرے
آپ اپنی مثال ہیں ہم لوگ

جون ایلیا

نام ہی کیا نشاں ہی کیا خواب و خیال ہو گئے
تیری مثال دے کے ہم تیری مثال ہو گئے
وہ خیال محال کس کا تھا
آئنہ بے مثال کس کا تھا
اک چہرۂ ِ سادہ تھا جو ہم کو
بے مثل و مثال چاہیے تھا
گفتگو جب محال کی ہو گی
بات اس کی مثال کی ہو گی

عرفان صدیقی

سخن میں کب سے ہے روشن، یہ کیا ضروری ہے
کہ وہ ستارہ سرِ مطلعِ مثال بھی آئے

جمال احسانی

تمام آئینہ خانے کی لاج رہ جاتی
کوئی بھی عکس اگر بے مثال رہ جاتا

ادا جعفری

آنسو جو رکا وہ کشت جاں میں
بارش کی مثال آ گیا ہے
خود حجابوں سا خود جمال سا تھا
دل کا عالم بھی بے مثال سا تھا

بشیر بدر

تمام عمر غریبی میں با وقار رہے
ہمارے عہد میں ایسی کوئی مثال نہیں
وہ لا شریک ہے اس کا کوئی شریک کہاں
وہ بے مثال ہے اس کی کوئی مثال نہیں

عبید اللہ علیم

بس ایک قامتِ زیبا کے خواب میں رہنا
بسا ایک شخص کو حد مثال کر رکھنا

علی سردار جعفری

ایسے دیوانے پھر نہ آئیں گے
دیکھ لو ہم کو بے مثال ہیں ہم

غلام محمد قاصر

کچھ ان کا حسن بھی تھا ماورا مثالوں سے
کچھ اپنا عشق بھی ہم بے مثال رکھتے تھے

رسا چغتائی

عشق کار پیمبرانہ ہے
جس کو چھونا مثال کر رکھنا
حسن بزم مثال میں کیا ہے
آئینے کے خیال میں کیا ہے

عزیز حامد مدنی

ہم ایسے کون تھے لیکن قفس کی یہ دنیا
کہ پر شکستوں میں اپنی مثال سے بھی گئے
نافۂ آہوئے تتار زخم نمود کا شکار
دشت سے زندگی کی رو ایک مثال لے گئی

احمد فراز

ایسا نشہ تو زہر میں بھی نہ تھا
اے غمِ دل تری مثال کہاں
فقط ہنر ہی نہیں عیب بھی کمال کے رکھ
سو دوسروں کے لیے تجربے مثال کے رکھ
مرے نہ ہار کے ہم قیس و کوہکن کی طرح
اب عاشقی میں ہماری مثال جو بھی ہو

شاذ تمکنت

شفق گلال کلی چاندنی الاپ سحر
نظر کے سامنے آئے تری مثال کے ساتھ
تو بے مثال ہے تیری مثال کیا پوچھوں
میں کچھ نہیں مگر اپنی مثال پوچھوں گا

میرا جی

چاہت میں ہمارا جینا مرنا
آپ اپنی مثال ہو گیا ہے