آئنہ بے مثال کس کا تھا
جون ایلیا
وہ خیال محال کس کا تھا
آئنہ بے مثال کس کا تھا
سفری اپنے آپ سے تھا میں
ہجر کس کا وصال کس کا تھا
میں تو خود میں کہیں نہ تھا موجود
میرے لب پر سوال کس کا تھا
تھی مری ذات اک خیال آشوب
جانے میں ہم خیال کس کا تھا
جب کہ میں ہر نفس تھا بے احوال
وہ جو تھا میرا حال کس کا تھا
دوپہر بادِ تند کوچۂ یار
وہ غبار ملال کس کا تھا
فاعِلاتن مفاعِلن فِعْلن
خفیف مسدس مخبون محذوف مقطوع