مرزا غالب

ایسا آساں نہیں لہو رونا
دل میں طاقت، جگر میں حال کہاں
گر خامشی سے فائدہ اخفائے حال ہے
خوش ہوں کہ میری بات سمجھنی محال ہے
ان کے دیکھے سے جو آ جاتی ہے منہ پر رونق
وہ سمجھتے ہیں کہ بیمار کا حال اچھا ہے

انشاء اللہ خان انشا

دوہرے پتوں کے زیرِ سایہ ہوا
سب قلم بند حال بوسے کا
مجلس وجد میں پڑھ اپنی غزل تو انشاؔ
کر ہی بیٹھے گا ابھی سنتے ہی حال ایک نہ ایک

حیدر علی آتش

یقیں ہے دیکھتے صوفی تو دم نکل جاتا
ہمارے وجد کے عالم میں ہے جو حال ہوا
اک دم میں جا ملوں گا عزیزان رفتہ سے
کیا عرصہ ہے زمانۂِ ماضی سے حال کا
پیری سے مرا نوع دگر حال ہوا ہے
وہ قد جو الف سا تھا سو اب دال ہوا ہے
مقبول مرے قول سے قوال ہوا ہے
صوفی کو غزل سن کے مری حال ہوا ہے
بیمار رہا برسوں میں عیسیٰ نفسوں میں
پوچھا نہ کسی نے کبھی کیا حال ہوا ہے

مصحفی غلام ہمدانی

سامنے آنکھوں کے ہر دم تری تمثال ہے آج
دل بھرا آئے نہ کیونکر کہ برا حال ہے آج
نہیں بے وجہ گرفتاری درویش اس میں
آہو و شیر کی ہوتی ہے عجب حال کی کھال
جس کے ہر دانے سے اک قطرۂِ خوں ٹپکے ہے
ہے منڈھی میان پہ قاتل کے عجب حال کی کھال
شب جو دل دو دو ہاتھ اچھلتا تھا
وجد تھا یا وہ حال تھا کیا تھا
فرقت میں تری ہے مصحفیؔ کو
لکھنا یہی حسبِ حال دن رات

مصطفٰیٰ خان شیفتہ

اصحابِ درد کو ہے عجب تیزیِ خیال
مثل زبانِ نطق قلم کی زبانِ حال
ساقی پلا وہ بادہ کہ غفلت ہو آ گہی
مطرب سنا وہ نغمہ کہ ہو جس سے قال، حال

فیض احمد فیض

کوئی یار جاں سے گزرا، کوئی ہوش سے نہ گزرا
یہ ندیم یک دو ساغر مرے حال تک نہ پہنچے

مرزا رفیع سودا

دو چار شعر آگے اس کے پڑھے تو بولا
مضموں یہ تو نے اپنے کیا حسبِ حال باندھے
کب دل شکست گاں سے کر عرضِ حال آیا
ہے بے صدا وہ چینی جس میں کہ بال آیا
دیر خراب میں کل اک مست کی زباں پر
یہ شعر اس جگہ کے کیا حسبِ حال آیا

باقی صدیقی

ہم پوچھ سکے نہ حال تیرا
لے آیا کہاں خیال تیرا
ہم دیکھیت رہ گئے جہاں کو
پوچھا تھا کسی نے حال تیرا
غمِ دل پر غمِ جہاں کا گماں
چھوڑیے لطف عرضِ حال گیا
ماضی میں ہیں اب نہ حال میں ہم
رہتے ہیں ترے خیال میں ہم
فروا ہے کوئی خیال جیسے
یوں مست ہیں انے حال میں ہم
جھک گئی آنکھ عرضِ حال کے ساتھ
بات جاتی رہی سوال کے ساتھ
ایک الزام بن گئی باقیؔ
فکرِ فردا بھی ذکر حال کے ساتھ
دیکھ کر آ گیا ہے ان کو خیال
ورنہ کرتا ہے کون پرسشِ حال
ہمہ تن عرضِ حال ہیں ہم لوگ
اک مجسم سوال ہیں ہم لوگ

جون ایلیا

جب کہ میں ہر نفس تھا بے احوال
وہ جو تھا میرا حال کس کا تھا
میں کیا ہوں بس اک ملال ماضی
اس شخص کو حال چاہیے تھا
آج کہنا ہے دل کو حال اپنا
آج تو سب کے حال کی ہو گی
عہدِ ماضی جو تھا عجب پر حال
ایک ویران حال چھوڑ گیا

عرفان صدیقی

میرے سکوت نے عیاں رنجِ کہن کیا نہیں
میں نے سخن کیا نہیں پرسشِ حال کے بغیر
اس سے اک حرفِ دل آزار کا رشتہ ہی سہی
یوں بھی ہوتی ہے کہاں پرسشِ حال اور کہیں
ذرا سی بات ہے دل میں اگر بیاں ہو جائے
تمام مسئلے اظہارِ حال ہی کے تو ہیں
کہاں کے شعر و سخن ماہ و سال دوسرے ہیں
کچھ اور بات کرو سب کے حال دوسرے ہیں
بچھڑ گئے کہیں رستے میں ہم سفر موسم
گئے دنوں کے تعاقب میں حال سے بھی گئے

جمال احسانی

جو تو گیا تھا تو تیرا خیال رہ جاتا
ہمارا کوئی تو پرسان حال رہ جاتا

اختر شیرانی

تری یاد میں ہوا جب سے گم ترے گم شدہ کا یہ حال ہے
کہ نہ دور ہے نہ قریب ہے نہ فراق ہے نہ وصال ہے

ادا جعفری

غم کو نہ زیاں کہو کہ دل میں
اک صاحب حال آ گیا ہے
خوف اندھیروں کا ڈر اجالوں سے
سانحہ تھا تو حسبِ حال سا تھا
جس کی جانب اداؔ نظر نہ اٹھی
حال اس کا بھی میرے حال سا تھا

عبید اللہ علیم

کھلا کہ عشق نہیں ہے کچھ اور اس کے سوا
رضائے یار جو ہو اپنا حال کر رکھنا

علی سردار جعفری

رونق کاروبار ہستی ہیں
ہم نے مانا شکستہ حال ہیں ہم

غلام محمد قاصر

زخموں کو چھپانے کی خاطر کپڑے ہی بدلنا چھوڑ دیا
پوچھو تو سہی ہم کس کے لیے اپنا یہ حال بناتے ہیں

احمد راہی

اسے تو اس کا کوئی رنج بھی نہ ہو شاید
کہ اس کی بزم سے کوئی شکستہ حال گیا

تلوک چند محروم

کیا سنائیں کسی کو حال اپنا
اپنے دل میں رہے ملال اپنا
ہے یہ پر درد داستاں محرومؔ
کیا سنائیں کسی کو حال اپنا
دل میں کہتے ہیں کہ اے کاش نہ آئے ہوتے
ان کے آنے سے جو بیمار کا حال اچھا ہے
برا ہو الفت خوباں کا ہم نشیں ہم تو
شباب ہی میں برا اپنا حال کر بیٹھے

جلیل مانک پوری

نہ خوشی اچھی ہے اے دل نہ ملال اچھا ہے
یار جس حال میں رکھے وہی حال اچھا ہے
بات الٹی وہ سمجھتے ہیں جو کچھ کہتا ہوں
اب کے پوچھا تو یہ کہہ دوں گا کہ حال اچھا ہے
یار تک روز پہنچتی ہے برائی میری
رشک ہوتا ہے کہ مجھ سے مرا حال اچھا ہے
اپنی آنکھیں نظر آتی ہیں جو اچھی ان کو
جانتے ہیں مرے بیمار کا حال اچھا ہے

حسرت موہانی

نہ سہی گر انہیں خیال نہیں
کہ ہمارا بھی اب وہ حال نہیں

رسا چغتائی

سامنے جی سنبھال کر رکھنا
پھر وہی اپنا حال کر رکھنا
بات اظہارِ حال میں کیا تھی
راز اخفائے حال میں کیا ہے

سیف الدین سیف

جی درد سے ہے نڈھال اپنا
کس کس کو سنائیں حال اپنا

شاد عظیم آبادی

لگی نسیم بہاری جو معرفت گانے
گلوں پہ کچھ نہیں موقوف سب کو حال آیا
پیام بر کو عبث دے کے خط ادھر بھیجا
غریب اور وہاں سے شکستہ حال آیا

عزیز حامد مدنی

تازہ ہوا بہار کی دل کا ملال لے گئی
پائے جنوں سے حلقۂ گردش حال لے گئی

فانی بدایونی

کیا چھپاتے کسی سے حال اپنا
جی ہی جب ہو گیا نڈھال اپنا
باخبر ہیں وہ سب کی حالت سے
لاؤ ہم پوچھ لیں نہ حال اپنا

افضل منہاس

گہرا سکوت ذہن کو بے حال کر گیا
سوچوں کے پھول پھول کو پامال کر گیا
میں دو قدم چلا تھا کہ ڈھلوان آ گئی
افضلؔ سفر تو میرا برا حال کر گیا

احمد فراز

دل بدن کا شریک حال کہاں
ہجر پھر ہجر ہے وصال کہاں
مرگِ انبوہ جشن شادی ہے
مل گئے دوست حسبِ حال ہمیں
نہ شب و روز ہی بدلے ہیں نہ حال اچھا ہے
کس برہمن نے کہا تھا کہ یہ سال اچھا ہے
چلو اسی سے کہیں دل کا حال جو بھی ہو
وہ چارہ گر تو ہے اس کو خیال جو بھی ہو
مجھے بھی شوق نہ تھا داستاں سنانے کا
فرازؔ اس نے بھی پوچھا تھا حال ویسے ہی
وہ رشک غزالاں تھا مگر دام میں اس کے
ہم جیسے کئی صیدِ زبوں حال بندھے تھے

امیر مینائی

اچھے عیسیٰ ہو، مریضوں کا خیال اچھا ہے
ہم مرے جاتے ہیں، تم کہتے ہو حال اچھا ہے

شاذ تمکنت

بھٹک رہا ہوں کہ فردا کا راستہ گم ہے
قدم قدم مرا ماضی ہے میرے حال کے ساتھ
بہت دنوں سے ہے جی میں سوال پوچھوں گا
میں تیرے آئنے سے تیرا حال پوچھوں گا

کلیم عاجز

نہ بندۂ عقل و ہوش دیں گے نہ اہل فکر و خیال دیں گے
تمہاری زلفوں کو جو درازی تمہارے آشفتہ حال دیں گے

میرا جی

اب اپنا یہ حال ہو گیا ہے
جینا بھی محال ہو گیا ہے

نوح ناروی

جائے تنگ است مردماں بسیار
حسرتوں کا یہ حال ہے دل میں