مرزا غالب

وہ فراق اور وہ وصال کہاں
وہ شب و روز و ماہ و سال کہاں

حیدر علی آتش

دیا جو رنج ترے عشق نے تو راحت تھی
فراق تلخ تو شیریں مجھے وصال ہوا
روزِ سیاہ ہجر میں میرے جلے چراغ
پروانوں کو نصیب ہوا دن وصال کا

مصحفی غلام ہمدانی

صحبت ہے ترے خیال کے ساتھ
ہے ہجر کی شبِ وصال کے ساتھ
پڑھ نہ اے ہم نشیں وصال کا شعر
جس سے رنگیں ہو خط و خال کا شعر
خواب تھا یا خیال تھا کیا تھا
ہجر تھا یا وصال تھا کیا تھا
ہم ایک بوسے کے بھی ممنوں نہیں کسی کے
چاہے سو کوئی تہمت روز وصال باندھے
یا تھی ہوس وصال دن رات
یا رہنے لگا ملال دن رات

جون ایلیا

سفری اپنے آپ سے تھا میں
ہجر کس کا وصال کس کا تھا
کب اس کا وصال چاہیے تھا
بس ایک خیال چاہیے تھا
نہ سمجھ پائیں گے وہ اہل فراق
جو اذیت وصال کی ہو گی
نہ کوئی ہجر نہ کوئی وصال ہے شاید
بس ایک حالت بے ماہ و سال ہے شاید

عرفان صدیقی

درد کی شب گزر گئی تیرے خیال کے بغیر
اب کے بجھا چراغِ ہجر، بادِ وصال کے بغیر
میرا جسم اور کہیں، میرا خیال اور کہیں
مجھ کو لے جائے گی، یہ موجِ وصال اور کہیں
تیرا سراپا میرا تماشا، کوئی تو برجِ زوال میں تھا
رات چراغِ ساعتِ ہجراں روشن طاقِ وصال میں تھا
سخن میں رنگ تمہارے خیال ہی کے تو ہیں
یہ سب کرشمے ہوائے وصال ہی کے تو ہیں
مری غزل کی زمیں ہے بدن سے آگے بھی
اسیر حلقۂ ہجر و وصال دوسرے ہیں
موجِ ہوا سے خاک کو تاب وصال کچھ نہیں
بانوئے کشور جمال میرا سوال کچھ نہیں
کہیں خیام لگیں قریہ وصال بھی آئے
شبِ سفر میں کبھی ساعتِ زوال بھی آئے

رئیس فروغؔ

مجھ کو تری نازکی کا احساس
دوران وصال بھی رہے گا

اختر شیرانی

مجھے اپنی پستی کی شرم ہے تری رفعتوں کا خیال ہے
مگر اپنے دل کو میں کیا کروں اسے پھر بھی شوق وصال ہے
انہیں ضد ہے عرض وصال سے مجھے شوق عرض وصال ہے
وہی اب بھی ان کا جواب ہے وہی اب بھی میرا سوال ہے
تری یاد میں ہوا جب سے گم ترے گم شدہ کا یہ حال ہے
کہ نہ دور ہے نہ قریب ہے نہ فراق ہے نہ وصال ہے
تری بزم خلوت لا مکاں ترا آستاں مہ و کہکشاں
مگر اے ستارۂ آرزو مجھے آرزوئے وصال ہے

عالم تاب تشنہ

میں وہی ہوں تشنۂؔ با وفا مرا آج بھی وہی مدعا
نہ فراق دے مجھے مستقل نہ مجھے ہمیشہ وصال دے

علی سردار جعفری

خوگر روئے خوش جمال ہیں ہم
ناز پروردۂ وصال ہیں ہم

تلوک چند محروم

نہ رہی بے خودی شوق میں اتنی بھی خبر
ہجر اچھا ہے کہ محرومؔ وصال اچھا ہے

جلیل مانک پوری

دیدار کی ہوس ہے نہ شوق وصال ہے
آزاد ہر خیال سے مست خیال ہے
آنکھیں بتا رہی ہیں کہ جاگے ہو رات کو
ان ساغروں میں بوئے شراب وصال ہے

حسرت موہانی

یاد انہیں وعدۂ وصال نہیں
کب کیا تھا یہی خیال نہیں

رسا چغتائی

تو نہیں ہے تو کون ہے مجھ میں
فرق ہجر و وصال میں کیا ہے

عزیز حامد مدنی

فراق سے بھی گئے ہم وصال سے بھی گئے
سبک ہوئے ہیں تو عیش ملال سے بھی گئے
نرم ہوا پہ یوں کھلے کچھ ترے پیرہن کے راز
سب ترے جسم ناز کے راز وصال لے گئی

احمد فراز

دل بدن کا شریک حال کہاں
ہجر پھر ہجر ہے وصال کہاں
لذتیں قرب و جدائی کی ہیں اپنی اپنی
مستقل ہجر ہی اچھا نہ وصال اچھا ہے
فرازؔ عشق کی دنیا تو خوبصورت تھی
یہ کس نے فتنۂ ہجر و وصال رکھا ہے

امیر مینائی

دیکھ لے بلبل و پروانہ کی بے تابی کو
ہجر اچھا، نہ حسینوں کا وصال اچھا ہے

شاذ تمکنت

عذابِ ہجر بھی ہے راحت وصال کے ساتھ
ملی تو ہیں مجھے خوشیاں مگر ملال کے ساتھ

محبوب خزاں

اس زمانے کو ترس جائیں گے ہم
آہ یہ تشنگی ہجر و وصال

نوح ناروی

سوالِ وصل پہ عذر وصال کر بیٹھے
وہ کس خیال سے ایسا خیال کر بیٹھے
وہ اس لیے مرے پہلو میں بیٹھتے ہی نہیں
کہ یہ کہیں نہ سوال وصال کر بیٹھے