انشاء اللہ خان انشا

گالیاں آپ شوق سے دیجے
رفع کیجے ملال بوسے کا
گالیاں آپ شوق سے دیجے
رفع کیجے ملال بوسہ کا
یار ہے پاس پر اب فرط تردد کے سبب
آ ہی رہتا ہے مرے دل کو ملال ایک نہ ایک

حیدر علی آتش

دکھا نہ دل کو صنم اتحاد رکھتا ہوں
مجھے ملال ہوا تو تجھے ملال ہوا
رونے کے بدلے حال پر اپنے ہنسا کیے
پردہ ہوا نہ فاش ہمارے ملال کا

مصحفی غلام ہمدانی

مہمان تھا کس کا تو شب اے ماہ
آتا ہے جو اس ملال کے ساتھ
مصحفیؔ شب جو چپ تو بیٹھا تھا
کیا تجھے کچھ ملال تھا کیا تھا
یا تھی ہوس وصال دن رات
یا رہنے لگا ملال دن رات

فیض احمد فیض

ترا لطف وجہِ تسکیں، نہ قرار شرحِ غم سے
کہ ہیں دل میں وہ گلے بھی جو ملال تک نہ پہنچے

مرزا رفیع سودا

اکسیر ہے تو کیا ہے وہ مشتِ خاک سوداؔ
خاطر پہ جب کسی کی جس سے ملال آیا

جون ایلیا

سخت زمیں پرست تھے عہدِ وفا کے پاسدار
اڑ کے بلندیوں میں ہم گردِ ملال ہو گئے
دوپہر بادِ تند کوچۂ یار
وہ غبار ملال کس کا تھا
ہم تم جو بچھڑ گئے ہیں ہم کو
کچھ دن تو ملال چاہیے تھا
وہ انہماک ہر اک کام میں کہ ختم نہ ہو
تو کوئی بات ہوئی ہے ملال ہے شاید
دل کو اب یہ بھی یاد ہو کہ نہ ہو
کون تھا کیا ملال چھوڑ گیا

عرفان صدیقی

یہ تمکنت کہیں پتھر بنا نہ دے تجھ کو
تو آدمی ہے ، خوشی بھی دکھا، ملال بھی کر
بچھڑنے ملنے کا قصہ تو چلتا رہتا ہے
نہیں نہیں مرے عیش و ملال دوسرے ہیں
سنا ہے سیر کو نکلی ہوئی ہے موجِ نشاط
عجب نہیں طرفِ کوچۂ ملال بھی آئے
وہ کہہ گیا ہے پھر آئیں گے ہم، اداس نہ ہو
تو ہم خوشی سے بھی چھوٹے ، ملال سے بھی گئے

جمال احسانی

بچھڑتے وقت ڈھلکتا نہ گر ان آنکھوں سے
اس ایک اشک کا کیا کیا ملال رہ جاتا

رئیس فروغؔ

کچھ اتنے پاس سے ہو کر وہ روشنی گزری
کہ آج تک در و دیوار کو ملال سا ہے

ادا جعفری

ویسے ہی خیال آ گیا ہے
یا دل میں ملال آ گیا ہے
کیا قیامت ہے حجلۂ جاں میں
اس کے ہوتے ہوئے ملال سا تھا

بشیر بدر

وہ شخص جس کو دل و جاں سے بڑھ کے چاہا تھا
بچھڑ گیا تو بظاہر کوئی ملال نہیں

غلام محمد قاصر

جبیں پہ آنے نہ دیتے تھے اک شکن بھی کبھی
اگرچہ دل میں ہزاروں ملال رکھتے تھے

ماجد صدیقی

بے رخی کی تو آپ ہی نے کی
آپ سے کچھ نہ تھا ہمیں تو ملال

تلوک چند محروم

کیا سنائیں کسی کو حال اپنا
اپنے دل میں رہے ملال اپنا
رواں ہیں اشک کسی کے فراق میں یا رب
کوئی نہ پرسش وجہ ملال کر بیٹھے

جلیل مانک پوری

نہ خوشی اچھی ہے اے دل نہ ملال اچھا ہے
یار جس حال میں رکھے وہی حال اچھا ہے

حسرت موہانی

مجھ کو اب غم یہ ہے کہ بعد مرے
خاطر یار بے ملال نہیں

خاطر غزنوی

محبتوں کے خرابوں میں دھوپ کم نکلی
کبھی جدائی کے کہرے کبھی ملال کی گرد

عزیز حامد مدنی

فراق سے بھی گئے ہم وصال سے بھی گئے
سبک ہوئے ہیں تو عیش ملال سے بھی گئے
غمِ حیات و غمِ دوست کی کشاکش میں
ہم ایسے لوگ تو رنج و ملال سے بھی گئے
تازہ ہوا بہار کی دل کا ملال لے گئی
پائے جنوں سے حلقۂ گردش حال لے گئی

فانی بدایونی

وہ بھی اب غم کو غم سمجھتے ہیں
دور پہنچا مگر ملال اپنا

احمد فراز

ہم کو بھی اپنی پائمالی کا
ہے مگر اس قدر ملال کہاں
رو رہے ہیں کہ ایک عادت ہے
ورنہ اتنا نہیں ملال ہمیں
دل نہ مانے بھی تو ایسا ہے کہ گاہے گاہے
یار بے فیض سے ہلکا سا ملال اچھا ہے
جب بھی دیار خندہ دلاں سے گزرے ہیں
اس سے آگے شہر ملال پڑا لوگو
اسی کے درد سے ملتے ہیں سلسلے جاں کے
اسی کے نام لگا دو ملال جو بھی ہو
تجھے ہے مشقِ ستم کا ملال ویسے ہی
ہماری جان تھی جاں پر وبال ویسے ہی

شاذ تمکنت

عذابِ ہجر بھی ہے راحت وصال کے ساتھ
ملی تو ہیں مجھے خوشیاں مگر ملال کے ساتھ
سکوتِ شام سے کیوں نسبت طبیعت ہے
سکوتِ شام سے وجہ ملال پوچھوں گا

نوح ناروی

اب آؤ مان بھی جاؤ جو کچھ ہوا وہ ہوا
ذرا سی بات کا اتنا ملال کر بیٹھے
نوحؔ گو منہ سے کچھ نہیں کہتے
ان کو تم سے ملال ہے دل میں