مرزا غالب

تھی وہ اک شخص کے تصور سے
اب وہ رعنائیِ خیال کہاں
ہے ہے خدا نہ خواستہ وہ اور دشمنی
اے شوقِ منفعل! یہ تجھے کیا خیال ہے
ہستی کے مت فریب میں آ جائیو اسدؔ
عالم تمام حلقۂِ دامِ خیال ہے
ہم کو معلوم ہے جنت کی حقیقت لیکن
دل کے خوش رکھنے کو غالب یہ خیال اچھا ہے

انشاء اللہ خان انشا

مجھے کام ان کے جمال سے نہ تو ٹپے سے نہ خیال سے
نہ تو وجد سے نہ تو حال سے نہ تو ناچ سے نہ تو راگ سے
زلف کو تھا خیال بوسے کا
خط نے لکھا سوال بوسے کا
تیرے غصے سے اب کوئی انشاؔ
چھوڑتا ہے خیال بوسے کا
صبح رخسار اس کے نیلے تھے
شب جو گزرا خیال بوسے کا
صبح رخسار اوس کے نیلے تھے
شب جو گزرا خیال بوسہ کا
کیا کروں گرچہ بھلاتا ہوں بہت میں لیکن
آ ہی رہتا ہے ترا مجھ کو خیال ایک نہ ایک

حیدر علی آتش

بجھایا آنکھوں نے وہ رخ تلاش مضموں میں
خیالِ یار مرا شعر کا خیال ہوا
ہنگام نزع محو ہوں تیرے خیال کا
مشتاق ہوں فرشتۂِ صاحبِ جمال کا

مصحفی غلام ہمدانی

صحبت ہے ترے خیال کے ساتھ
ہے ہجر کی شبِ وصال کے ساتھ
اس کے عشق کمر میں اے یارو
ہم تو کہنے لگے خیال کا شعر
خواب تھا یا خیال تھا کیا تھا
ہجر تھا یا وصال تھا کیا تھا
جمنا میں کل نہا کر جب اس نے بال باندھے
ہم نے بھی اپنے دل میں کیا کیا خیال باندھے
بے چین رکھے ہے میرے دل کو
کافر یہ ترا خیال دن رات

مصطفٰی خان شیفتہ

اصحابِ درد کو ہے عجب تیزیِ خیال
مثل زبانِ نطق قلم کی زبانِ حال

فیض احمد فیض

وہی چشمہء بقا تھا جسے سب سراب سمجھے
وہی خواب معتبر تھے جو خیال تک نہ پہنچے

مرزا رفیع سودا

جب یار نے اٹھا کر زلفوں کے بال باندھے
تب میں نے اپنے دل میں لاکھوں خیال باندھے
سینے سے میں دعا کو لایا جو شب لبوں تک
کہنے لگی اجابت کیدھر خیال آیا

باقی صدیقی

ہم پوچھ سکے نہ حال تیرا
لے آیا کہاں خیال تیرا
جیسے کسی غیر کا تصور
یوں آتا ہے اب خیال تیرا
ٹوٹے ہیں تعلقات کیونکر
میرا تھا نہ یہ خیال تیرا
جس طرف بھی ترا خیال گیا
اک نئے عم کی طرح ڈال گیا
ہر تمنا پہ غم کا پہرہ تھا
پھر بھی کس کس طرف خیال گیا
ماضی میں ہیں اب نہ حال میں ہم
رہتے ہیں ترے خیال میں ہم
آئے نہ ادھر غمِ زمانہ
بیٹھے ہیں ترے خیال میں ہم
اے غم زیست اس پہ کیا گزری
اک تمنا بھی تھی خیال کے ساتھ
دیکھ کر آ گیا ہے ان کو خیال
ورنہ کرتا ہے کون پرسشِ حال
آرزوئے سکونِ دل توبہ
آپ کی بزم تک گیا ہے خیال
حسیں حسیں نظر آتے ہیں آرزوؤں کے جال
نئی نئی ہے محبت، جواں جواں ہیں خیال
کس اعتماد پہ دعویٰ کریں محبت کا
بدل بھی جاتے ہیں اے دوست آدمی کے خیال
آپ سمجھیں تو ایک حقیقت ہیں
ورنہ خواب و خیال ہیں ہم لوگ

جون ایلیا

نام ہی کیا نشاں ہی کیا خواب و خیال ہو گئے
تیری مثال دے کے ہم تیری مثال ہو گئے
تھی مری ذات اک خیال آشوب
جانے میں ہم خیال کس کا تھا
کب اس کا وصال چاہیے تھا
بس ایک خیال چاہیے تھا
زندگی ہے خیال کی اک بات
جو کسی بے خیال کی ہو گی
مسکن ماہ و سال چھوڑ گیا
دل کو اس کا خیال چھوڑ گیا

عبدالحمید عدم

اے دوست تیری زلفِ پریشاں کی خیر ہو
میری تباہیوں کا نہ اتنا خیال کر

عرفان صدیقی

درد کی شب گزر گئی تیرے خیال کے بغیر
اب کے بجھا چراغِ ہجر، بادِ وصال کے بغیر
میرا جسم اور کہیں، میرا خیال اور کہیں
مجھ کو لے جائے گی، یہ موجِ وصال اور کہیں
میری چشمِ تحیر آگے اور ہی نقش ہویدا تھے
چہرہ اپنے وہم میں تھا‘ آئینہ اپنے خیال میں تھا
میں چاہتا ہوں کہ اب جو بھی جی میں آئے کروں
تجھے بھی میری اجازت ہے جو خیال بھی کر
سخن میں رنگ تمہارے خیال ہی کے تو ہیں
یہ سب کرشمے ہوائے وصال ہی کے تو ہیں
چراغ بجھ گئے دل کی لویں بچائے رکھو
کہ اب کے موجِ ہوا کے خیال دوسرے ہیں
ہم اہلِ شعر جو حسنِ خیال سے بھی گئے
تو دلبرانِ غزل خط و خال سے بھی گئے

جمال احسانی

جو تو گیا تھا تو تیرا خیال رہ جاتا
ہمارا کوئی تو پرسان حال رہ جاتا

رئیس فروغؔ

ترے دیار میں کیا تیز دھوپ تھی لیکن
گھنے درخت بھی کچھ کم نہ تھے خیال سا ہے
دنیا کا وبال بھی رہے گا
کچھ اپنا خیال بھی رہے گا

اختر شیرانی

مجھے اپنی پستی کی شرم ہے تری رفعتوں کا خیال ہے
مگر اپنے دل کو میں کیا کروں اسے پھر بھی شوق وصال ہے
اس ادا سے کون یہ جلوہ گر سر بزمِ حسنِ خیال ہے
جو نفس ہے مست بہار ہے جو نظر ہے غرق جمال ہے
میں بتاؤں واعظ خوش نوا ہے جہان و خلد میں فرق کیا
یہ اگر فریبِ خیال ہے وہ فریب حسنِ خیال ہے
وہ خوشی نہیں ہے وہ دل نہیں مگر ان کا سایہ سا ہم نشیں
فقط ایک غم زدہ یاد ہے فقط اک فسردہ خیال ہے

ادا جعفری

ویسے ہی خیال آ گیا ہے
یا دل میں ملال آ گیا ہے
عکس میرا بھی آئنوں میں نہیں
وہ بھی کیفیت خیال سا تھا

بشیر بدر

میں آسمان سے ٹوٹا ہوا ستارہ ہوں
کہاں ملی تھی یہ دنیا مجھے خیال نہیں

عالم تاب تشنہ

مری دسترس میں ہے گر قلم مجھے حسن فکر و خیال دے
مجھے شہر یار سخن بنا اور عنان شہر کمال دے

علی سردار جعفری

رنگ ہی رنگ خوشبو ہی خوشبو
گردش ساغر خیال ہیں ہم

غلام محمد قاصر

نظر نظر میں ادائے جمال رکھتے تھے
ہم ایک شخص کا کتنا خیال رکھتے تھے

احمد راہی

وہ ایک ذات جو خواب و خیال لائی تھی
اسی کے ساتھ ہر اک خواب ہر خیال گیا

ماجد صدیقی

ماجدؔ رہیں نصیب یہ دانائیاں انہیں
قدغن لگا رہے ہیں جو برقِ خیال پر

تلوک چند محروم

پیچ در پیچ گیسوئے مشکیں
جا کے الجھا کہاں خیال اپنا
نہ علم ہے نہ زباں ہے تو کس لیے محرومؔ
تم اپنے آپ کو شاعر خیال کر بیٹھے

جلیل مانک پوری

آنکھوں سے خواب کا ہو گزر کیا مجال ہے
پہرے بٹھا دیے ہیں کسی کے خیال کے
صد شکر وصف قد پہ وہ اتنا تو پھول اٹھے
مضموں بلند ہیں مرے عالی خیال کے
دیدار کی ہوس ہے نہ شوق وصال ہے
آزاد ہر خیال سے مست خیال ہے
برساؤ تیر مجھ پہ مگر اتنا جان لو
پہلو میں دل ہے دل میں تمہارا خیال ہے
بت کہہ دیا جو میں نے تو اب بولتے نہیں
اتنی سی بات کا تمہیں اتنا خیال ہے
پوچھا جو ان سے جانتے ہو تم جلیلؔ کو
بولے کہ ہاں وہ شاعر نازک خیال ہے

حسرت موہانی

نہ سہی گر انہیں خیال نہیں
کہ ہمارا بھی اب وہ حال نہیں
یاد انہیں وعدۂ وصال نہیں
کب کیا تھا یہی خیال نہیں

رسا چغتائی

حسن بزم مثال میں کیا ہے
آئینے کے خیال میں کیا ہے
آپ دامن کشاں گزرتے ہیں
رہ گزار خیال میں کیا ہے

خاطر غزنوی

کبھی تو گزرے ادھر سے بھی کاروان بہار
کبھی تو پہنچے یہاں بھی ترے خیال کی گرد
تمام عالمِ امکاں ہے اک خیال میں گم
نہ پا سکے گا زمانہ کبھی خیال کی گرد

سیف الدین سیف

جس دن سے بھلا دیا ہے تو نے
آتا ہی نہیں خیال اپنا
ہے سیفؔ محیط ہر دو عالم
اک سلسلۂ خیال اپنا

سیماب اکبر آبادی

آزردہ اس قدر ہوں سراب خیال سے
جی چاہتا ہے تم بھی نہ آؤ خیال میں
دنیا ہے خواب حاصلِ دنیا خیال ہے
انسان خواب دیکھ رہا ہے خیال میں

شاد عظیم آبادی

غمِ فراق مے و جام کا خیال آیا
سفید بال لیے سر پہ اک وبال آیا

عزیز حامد مدنی

وہ لوگ جن سے تری بزم میں تھے ہنگامے
گئے تو کیا تری بزمِ خیال سے بھی گئے
شعلۂ دل بجھا بجھا خاک زباں اڑی اڑی
دشت ہزار دام سے موجِ خیال لے گئی

فانی بدایونی

ہم ہیں اس کے خیال کی تصویر
جس کی تصویر ہے خیال اپنا

احمد فراز

میں نئی دوستی کے موڑ پہ تھا
آ گیا ہے ترا خیال کہاں
تجھ پہ لکھی تو سج گئی ہے غزل
آ ملا خواب سے خیال کہاں
لے اڑا پھر کوئی خیال ہمیں
ساقیا ساقیا سنبھال ہمیں
اختلاف جہاں کا رنج نہ تھا
دے گئے مات ہم خیال ہمیں
حساب لطف حریفاں کیا ہے جب تو کھلا
کہ دوستوں نے زیادہ خیال رکھا ہے
چلو اسی سے کہیں دل کا حال جو بھی ہو
وہ چارہ گر تو ہے اس کو خیال جو بھی ہو
چلا تھا ذکر زمانے کی بے وفائی کا
سو آ گیا ہے تمہارا خیال ویسے ہی

امیر مینائی

اچھے عیسیٰ ہو، مریضوں کا خیال اچھا ہے
ہم مرے جاتے ہیں، تم کہتے ہو حال اچھا ہے
آ گیا اس کا تصور، تو پکارا یہ شوق
دل میں جم جائے الٰہی، یہ خیال اچھا ہے

شاذ تمکنت

یہی بہت ہے زمانہ میں چار دن کے لیے
اگر حیات کٹے ایک ہم خیال کے ساتھ
کچھ اس طرح شبِ مہ نے کرن کی دستک دی
ابھر گئیں کئی چوٹیں کسی خیال کے ساتھ
مرا خیال ہے میری نگاہ میں ہے جمال
ترے جمال کا کیا ہے خیال پوچھوں گا

کلیم عاجز

نہ بندۂ عقل و ہوش دیں گے نہ اہل فکر و خیال دیں گے
تمہاری زلفوں کو جو درازی تمہارے آشفتہ حال دیں گے

محبوب خزاں

میٹھی باتوں سے ادا جاگتی ہے
نرم آنکھوں میں سنورتے ہیں خیال
آپ کی یاد بھی آ جاتی ہے
اتنی محروم نہیں بزمِ خیال

محسن احسان

جہاں پہ تجھ سے بچھڑنا بہت ضروری تھا
اسی جگہ پہ کھڑے ہیں ترے خیال میں ہم

محسن نقوی

سانسوں کے اس ہنر کو نہ آساں خیال کر
زندہ ہوں ساعتوں کو میں صدیوں میں ڈھال کر

میرا جی

دل محو جمال ہو گیا ہے
یا صرف خیال ہو گیا ہے

نوح ناروی

سوالِ وصل پہ عذر وصال کر بیٹھے
وہ کس خیال سے ایسا خیال کر بیٹھے
ہم اٹھتے بیٹھتے بھی ان کے پاس ڈرتے ہیں
وہ اور کچھ نہ الٰہی خیال کر بیٹھے
اس حسیں کا خیال ہے دل میں
جس کا آنا محال ہے دل میں
کیوں نہ دل اس خیال سے خوش ہو
کہ تمہارا خیال ہے دل میں