باقی صدیقی

ملتا ہے جہاں کوئی چمکتا ہوا ذرہ
رکتے ہیں وہیں لوگ بھٹکتے ہیں وہیں لوگ
روشنی رنگ بدلتی ہے تمنا کی طرح
ہم بھٹک جاتے ہیں منزل تو وہیں ہوتی ہے

قمر جلالوی

کوئی ضد نہ تھی کوچے میں در ہی کے قریں، ہوتی
جہاں پر آپ کہہ دیتے مری تربت وہیں ہوتی
بجا ہے آپ بزمِ عدو سے اٹھ کے آ جاتے
اگر نالے نہ کرتا میں تو ساری شب وہیں ہوتی

عرفان صدیقی

یہ کون ہیں جو ببولوں سے چھاؤں مانگتے ہیں
ادھر جو ایک شجر ہے وہیں نہیں جاتے

رئیس فروغؔ

میرا بھی ایک باپ تھا اچھا سا ایک باپ
وہ جس جگہ پہنچ کے مرا تھا وہیں ہوں میں

ادا جعفری

کوئی قصہ ہجر و وصال کا نہ سنا مجھے
جو حریم درد تک آ گیا سو وہیں ملا

بہزاد لکھنوی

محبت مستقل کیف آفریں معلوم ہوتی ہے
خلش دل میں جہاں پر تھی وہیں معلوم ہوتی ہے

زہرا نگاہ

اندازہ ہوا کہ رہ وہی ہے
امید بڑھی کہ تم وہیں ہو

سیماب اکبر آبادی

ان کی محفل سے تصور کا تعلق ہے ہمیں
آنکھ کر لیتے ہیں جب بند وہیں ہوتے ہیں

عزیز حامد مدنی

گہرے سرخ گلاب کا اندھا بلبل سانپ کو کیا دیکھے گا
پاس ہی اگتی ناگ پھنی تھی سارے پھول وہیں ملتے ہیں

اختر ہوشیارپوری

نہ جانے کیا دھند درمیاں تھی کہ کوہ کن کی نظر نہ پہنچی
جہاں سے پھوٹا تھا چشمۂ ماہ شب کا پتھر بھی تو وہیں تھا

احمد فراز

چھوڑ آئے عبث در جاناں
یار سب کچھ وہیں تھا جو کچھ تھا