باقی صدیقی

آب حیواں بھی نہیں مجھ پہ حرام
زہر کی مجھ کو ضرورت ہی سہی

عرفان صدیقی

ظرفِ منعم سے بڑا ہے مرا دامانِ طلب
اپنی زر مہریں گنو میری ضرورت پہ نہ جاؤ
ہاں اہلِ زر کے پاس خزانے تو ہیںؓ مگر
مولاؑ کا یہ فقیر ضرورت کہاں سے لائے

احسان دانش

جس کا گریز شرط ہو تقریب دید میں
اس ہوش اس نظر کی ضرورت نہیں مجھے
میں کیوں کسی کے عہدِ وفا کا یقیں کروں
اتنی شدید غم کی ضرورت نہیں مجھے

بشیر بدر

اے پیر خرد منداں دل کی بھی ضرورت ہے
یہ شہر غزالاں ہے یہ ملک جوانی ہے

جوش ملیح آبادی

آپ اک جلوہ سراسر میں سراپا اک نظر
اپنی حاجت دیکھیے میری ضرورت دیکھیے

حفیظ ہوشیارپوری

لفظ ابھی ایجاد ہوں گے ہر ضرورت کے لیے
شرح راحت کے لیے غم کی صراحت کے لیے

رسا چغتائی

میرؔ جی سے اگر ارادت ہے
قول ناسخؔ کی کیا ضرورت ہے

شکیل بدایونی

سخت سہی ہستی کے مراحل عشق میں راحت آج بھی ہے
اے غمِ جاناں ہو نہ گریزاں تیری ضرورت آج بھی ہے
یہ کس نے کہا تم سے کہ روداد وفا کو
سن کر بھی سمجھنے کی ضرورت نہ سمجھنا

فانی بدایونی

ہر بے گناہ سے وعدۂ بخشش ہے روزِ حشر
گویا گناہ کی بھی ضرورت نہیں رہی

اکبر حمیدی

جس طرح پھول کی گلستاں کو
زندگی کو مری ضرورت ہے

شاذ تمکنت

یہ مجبوری، محبت بھیک جیسی بھی گوارا ہے
کبھی دن رات کو تیری ضرورت ایسی ہوتی ہے

فراق گورکھپوری

اب وہ اتنا بھی نہیں بیگانۂ وجہ ملال
پرسشِ غم اس کو آتی ہے ضرورت بھی تو ہو
جیسے فنا بقا میں بھی کوئی کمی سی ہو
مجھ کو پڑی ہے تیری ضرورت کہاں کہاں

قابل اجمیری

تم نہ مانو مگر حقیقت ہے
عشق انسان کی ضرورت ہے
جی رہا ہوں اس اعتماد کے ساتھ
زندگی کو مری ضرورت ہے
حسن ہی حسن جلوے ہی جلوے
صرف احساس کی ضرورت ہے

کلیم عاجز

ہر چند غم و درد کی قیمت بھی بہت تھی
لینا ہی پڑا دل کو ضرورت بھی بہت تھی

محبوب خزاں

کس نے کہا آپ سے میری مصیبت ہے کیا
اب یہ ندامت ہے کیوں اس کی ضرورت ہے کیا

محسن نقوی

سنتا تھا وہ بھی سب سے پرانی کہانیاں
شاید رفاقتوں کی ضرورت اسے بھی تھی

میرا جی

زندگی ایک اذیت ہے مجھے
تجھ سے ملنے کی ضرورت ہے مجھے

ناصر کاظمی

اے دوست ہم نے ترکِ محبت کے باوجود
محسوس کی ہے تیری ضرورت کبھی کبھی