باقی صدیقی

دنیا کو ہے شغل سے مطلب
تم ہارو یا باقیؔ ہارے
جیتنے والے محبت میں بہت ہیں باقیؔ
دیکھنا یہ ہے کہ اس کھیل میں ہارے کتنے

رئیس فروغؔ

یہی بساط اگر ہے تو ایک روز فروغؔ
جو ہم سے جیت چکا ہے وہ ہم سے ہارے گا

حفیظ جالندھری

تجھے تو ابھی دیر تک کھیلنا ہے
اسی میں تو ہے جیت ہارے چلا چل
اٹھ اٹھ کے بیٹھ بیٹھ چکی گردِ راہ کی
یارو وہ قافلے تھکے ہارے کہاں گئے

شکیل بدایونی

مشکل تھا کچھ تو عیش کی بازی کا جیتنا
کچھ جیتنے کے خوف سے ہارے چلے گئے
میں شکیلؔ ان کا ہو کر بھی نہ پا سکا ہوں ان کو
مری طرح زندگی میں کوئی جیت کر نہ ہارے

عزیز حامد مدنی

اے حریفان غم گردشِ ایام آؤ
ایک ہی غول کے ہم لوگ ہیں ہارے ہوئے لوگ

احمد فراز

ہم کہ نادان جواری ہیں سبھی جانتے ہیں
دل کی بازی ہو تو جی جان سے ہارے جائیں

کلیم عاجز

دل کی بازی لگے پھر جان کی بازی لگ جائے
عشق میں ہار کے بیٹھو نہیں ہارے جاؤ

ناصر کاظمی

پہنچے گور کنارے ہم
بس غمِ دوراں ہارے ہم
دیکھ خیال خاطرِ دوست
بازی جیت کے ہارے ہم