جون ایلیا

سب سے پر امن واقعہ یہ ہے
آدمی آدمی کو بھول گیا
آسمانوں میں ہے خدا تنہا
اور ہر آدمی سے خطرہ ہے

جگر مراد آبادی

آدمی آدمی سے ملتا ہے
دل مگر کم کسی سے ملتا ہے

شکیب جلالی

سمجھ سکو تو یہ تشنہ لبی سمندر ہے
بقدرِ ظرف ہر اک آدمی سمندر ہے

احسان دانش

ہیں مرے حلقہ علم میں بالیقیں
آسماں کے پیام آدمی کی طرف
دانشؔ انکار خالق سے ہوتا نہیں
دیکھتا ہوں میں جب آدمی کی طرف
رموز بے خودی سمجھے نہ اسرار خودی سمجھے
بڑی شے ہے اگر اپنی حقیقت آدمی سمجھے
جب احساس بلندی پست کر دیتا ہے فطرت کو
یہ مشکل ہے پھر انساں آدمی کو آدمی سمجھے

بشیر بدر

گھروں پہ نام تھے ناموں کے ساتھ عہدے تھے
بہت تلاش کیا کوئی آدمی نہ ملا
وہ صورت گرد غم میں چھپ گئی ہو
بہت ممکن یہ وہ ہی آدمی ہو

علی سردار جعفری

ہیں کام بہت ابھی کہ دنیا
شائستۂ آدمی نہیں ہے

اختر امام رضوی

اک مشت خاک آگ کا دریا لہو کی لہر
کیا کیا روایتیں ہیں یہاں آدمی کے ساتھ

سید ضمیر جعفری

ہم کو سب رسوائیاں منظور ہیں
احترام آدمی کرتے ہیں ہم

شاذ تمکنت

جہاں میں ہے کہ کمیں گاہ میں خدا جانے
اب اس قدر بھی سبک آدمی نہ بن جائے

فراق گورکھپوری

زمیں بدلی فلک بدلا مذاق زندگی بدلا
تمدن کے قدیم اقدار بدلے آدمی بدلا
دیوتاؤں کا خدا سے ہو گا کام
آدمی کو آدمی درکار ہے

قتیل شفائی

جوانی کو سزائے لذت احساس دے دینا
میں اس حد پر خدا کو آدمی محسوس کرتا ہوں

قیوم نظر

حیوان صفت ہوا ہے آخر
دکھلایا کمال آدمی نے

کیف بھوپالی

سایہ ہے کم کھجور کے اونچے درخت کا
امید باندھئے نہ بڑے آدمی کے ساتھ
چلتے ہیں بچ کے شیخ و برہمن کے سائے سے
اپنا یہی عمل ہے برے آدمی کے ساتھ

محبوب خزاں

جنوں سے کھیلتے ہیں آ گہی سے کھیلتے ہیں
یہاں تو اہلِ سخن آدمی سے کھیلتے ہیں

محسن نقوی

اگرچہ میں اک چٹان سا آدمی رہا ہوں
مگر ترے بعد حوصلہ ہے کہ جی رہا ہوں

ناصر کاظمی

بول اے مرے دیار کی سوئی ہوئی زمیں
میں جن کو ڈھونڈتا ہوں کہاں ہیں وہ آدمی
سہمے سہمے تھے رات اہلِ چمن
تھا کوئی آدمی درختوں میں

نوح ناروی

کوئی کیسا ہے کوئی کیسا ہے
آدمیت ہر آدمی میں نہیں
غور سے دیکھیے تو سب کچھ ہے
کون سی بات آدمی میں نہیں