جگر مراد آبادی

ہر بار یاس ہجر میں دل کی ہوئی شریک
ہر مرتبہ امید نے دھوکا دیا مجھے

جوش ملیح آبادی

یہ مانا دونوں ہی دھوکے ہیں رندی ہو کہ درویشی
مگر یہ دیکھنا ہے کون سا رنگین دھوکا ہے
آ اور داد دے کہ بہ ایں چشم حق نگر
کھائے ہوئے ہوں زیست کا دھوکا ترے لیے

حفیظ جالندھری

یہ بھی اک دھوکا تھا نیرنگ طلسم عقل کا
اپنی ہستی پر بھی ہستی کا ہوا دھوکا مجھے
موت کہتے ہیں جسے ضبط کا یہ خبط نہ ہو
زندگی پر بھی ہے فریاد کا دھوکا ہم کو

شاذ تمکنت

میری وحشت کا ترے شہر میں چرچا ہو گا
اب مجھے دیکھ کے شاید تجھے دھوکا ہو گا
ہوس جلوہ نہیں ذوقِ تماشا بھی نہیں
کسی چہرے پہ ترے چہرے کا دھوکا بھی نہیں
کیا ہے میں نے اظہارِ تمنا جانے کس کس سے
مجھے اکثر تری صورت کا دھوکا ہو ہی جاتا ہے

فراق گورکھپوری

ہم کہے دیتے ہیں چالوں میں نہ آؤ ان کی
ثروت و جاہ کے عشووں سے بچو دھوکا ہے

محسن احسان

ہمیں بھیجا تو ہے دنیا میں لیکن
ہمارے ساتھ کچھ دھوکا ہوا ہے

ناصر کاظمی

اب تجھے کیا کیا یاد دلاؤں
اب تو وہ سب کچھ ہی دھوکا تھا