مرزا غالب

دیوانگی سے دوش پہ زنار بھی نہیں
یعنی ہمارے جیب میں اک تار بھی نہیں
مر جاؤں نہ کیوں رشک سے جب وہ تنِ نازک
آغوش خم حلقۂِ زنار میں آوے

امام بخش ناسخ

ہو گیا ضعف سے میرا بدن زار سفید
نظر آتا ہے صنم صورت زنار سفید

بہادر شاہ ظفر

ہے وہ بے وحدت کہ جو سمجھے ہے کفر و دیں میں فرق
رکھتی ہے تسبیح رشتہ تار سے زنار کے
دیں دے کے گیا کفر کے بھی کام سے عاشق
تسبیح کے ساتھ اس نے تو زنار بھی چھوڑا

حیدر علی آتش

خم ندامت سے کیا محراب میں کعبہ کے سر
گردن زاہد سے بوجھ اٹھا نہ جب زنار کا
قول اپنا ہے یہ سبحہ و زنار کے لیے
دو پھندے ہیں یہ کافر و دیں دار کے لیے
سودائے زلفِ یار میں کافر ہوا ہوں میں
سنبل کے تار چاہئیں زنار کے لیے

مصحفی غلام ہمدانی

صنعاں کی طرح اک بتِ کافر کے عشق میں
کافر ہو باندھنا ہمیں زنار ہو سو ہو

مومن خان مومن

مومنؔ کو تو نہ لائے کہیں دام میں وہ بت
ڈھونڈے ہے تار سبحہ کے زنار کے لیے

مرزا رفیع سودا

اٹھتے ہوئے جو دیر سے لی مدرسے کی راہ
تسبیح شیخِ شہر کی زنار کر چلے