مرزا غالب

سب کہاں؟ کچھ لالہ و گل میں نمایاں ہو گئیں
خاک میں کیا صورتیں ہوں گی کہ پنہاں ہو گئیں!
ہر قدم دوریِ منزل ہے نمایاں مجھ سے
میری رفتار سے بھاگے ہے ، بیاباں مجھ سے

حیدر علی آتش

آنسو آنکھوں سے نکلتا ہے سو چنگاری ہے
پردۂِ دل سے نمایاں نہ ہوا تھا سو ہوا
پھر سکی میرے گلے پر نہ چھری ہے ظالم
ورنہ گردوں سے ہوئے کار نمایاں کیا کیا

باقی صدیقی

شام و سحر کے رنگ نمایاں نہیں رہے
یا ہم شریک دیدہِ حیراں نہیں رہے

خواجہ میر درد

جھمکتے ہیں ستاروں کی طرح سوراخ ہستی کے
چھپایا گو کہ جوں خورشید میں داغ نمایاں کو

قمر جلالوی

اے قمر حالِ شبِ فرقت نہ ہم سے چھپ سکا
داغِ دل سارے زمانے میں نمایاں کر چلے

عرفان صدیقی

آئینہ سکوت نہ رکھ سب کے روبرو
میں دل پہ نقش ہوں تو نمایاں نہ کر مجھے

احسان دانش

تیری عشرت ہے کہ گردوں کے دبائے نہ دبی
میرا غم ہے کہ ہنسی میں بھی نمایاں نہ ہوا
ایک ہی جلوے سے احسانؔ نظر ہٹ نہ سکی
مجھ سے کچھ اس کے سوا کار نمایاں نہ ہوا

بہزاد لکھنوی

کہتا نہیں ہوں اور زمانہ ہے با خبر
چہرے سے دل کا حال نمایاں ہے کیا کروں

سید ضمیر جعفری

تو نے دیکھا ہی نہیں پیار سے ذروں کی طرف
آنکھ ہوتی تو ستارے بھی نمایاں ہوتے

سلام مچھلی شہری

نظم و افسانہ لکھوں چپ رہوں یا بات کروں
تم بہ ہر رنگ مگر مجھ میں نمایاں ہو ضرور

شاد عظیم آبادی

حق جتاتے ہیں شہیدان محبت بے کار
کیا یہ مرنا تھا بڑا کار نمایاں ان کا

فراق گورکھپوری

عشق اب بھی ہے وہ محرم بیگانہ نما
حسن یوں لاکھ چھپے لاکھ نمایاں ہو جائے

ناصر کاظمی

حاصلِ عشق ترا حسن پشیماں ہی سہی
میری حسرت تری صورت سے نمایاں ہی سہی