قمر جلالوی

دلِ مضطرب سن کہ افسانۂ غم وہ ناراض ہو کر ابھی سو گئے ہیں
جو چونکے تو اک حشر کر دیں گے برپا انہیں تو جگانے کی کوشش نہ کرنا

عرفان صدیقی

کوئلیں پھر بھولے بسرے غم جگانے آ گئیں
گرمیاں لے کر اداسی کے خزانے آ گئیں

بشیر بدر

دل اجڑی ہوئی ایک سرائے کی طرح ہے
اب لوگ یہاں رات جگانے نہیں آتے

شاد عظیم آبادی

آج کچھ شام سے چپ ہے دلِ محزوں کیا علم
کیوں خفا ہے مرا راتوں کا جگانے والا

اکبر حمیدی

اترا ہوں دیا لے کے نہاں خانۂ جاں میں
سوئے سوئے آسیب جگانے میں لگا ہوں

فراق گورکھپوری

یہ فسون نیم شب یہ خواب‌‌ ساماں خامشی
سامری فن آنکھ کے جادو جگانے کی کہو