گرمیاں لے کر اداسی کے خزانے آ گئیں
عرفان صدیقی
کوئلیں پھر بھولے بسرے غم جگانے آ گئیں
گرمیاں لے کر اداسی کے خزانے آ گئیں
ٹھنڈے دالانوں میں پھر کھلنے لگی دل کی کتاب
جلتی دوپہریں سرا پردے گرانے آ گئیں
ڈھک گئیں پھر صندلیں شاخیں سنہری بور سے
لڑکیاں دھانی دوپٹے سر پہ تانے آ گئیں
پھر دھنک کے رنگ بازاروں میں لہرانے لگے
تتلیاں معصوم بچوں کو رجھانے آ گئیں
کھل رہے ہوں گے چھتوں پر سانولی شاموں کے بال
کتنی یادیں ہم کو گھر واپس بلانے آ گئیں
دھول سے کب تک کوئی شفاف جذبوں کو بچائے
خواہشوں کی آندھیاں پھر خاک اڑانے آ گئیں
فاعِلاتن فاعِلاتن فاعِلاتن فاعِلن
رمل مثمن محذوف