قمر جلالوی

ساحل امیدِ وعدہ اب تو چھوڑو اے قمر
غرقِ بحرِ آسماں ایک ایک تارا ہو گیا

عرفان صدیقی

روشنیوں کے مالک اب ہم کو رستے کا اشارا دے
کالی رات دیا دے کوئی، جنگل کوئی تارا دے

ادا جعفری

دیپ تھا یا تارا کیا جانے
دل میں کیوں ڈوبا کیا جانے
ممتا اوٹ دہکتے سورج
آنکھوں کا تارا کیا جانے

فراق گورکھپوری

رونے والے ہوئے چپ ہجر کی دنیا بدلی
شمع بے نور ہوئی صبح کا تارا نکلا

قتیل شفائی

تم آ سکو تو شب کو بڑھا دوں کچھ اور بھی
اپنے کہے میں صبح کا تارا ہے ان دنوں

کیف بھوپالی

تیرا چہرہ صبح کا تارا لگتا ہے
صبح کا تارا کتنا پیارا لگتا ہے

مجروح سلطان پوری

شام تنہائی کی ہے آئے گی منزل کیسے
جو مجھے راہ دکھا دے وہی تارا نہ رہا

ناصر کاظمی

چلے تو ہیں جرسِ گل کا آسرا لے کر
نہ جانے اب کہاں نکلے گا صبح کا تارا
اب تو سو جاؤ ستم کے مارو
آسماں پر کوئی تارا نہ رہا