مرزا غالب

تختۂِ گور سفینے کے مماثل ہے اسدؔ
بحرِ غم کا نظر آتا ہے کنارا ہم کو

مصطفٰیٰ خان شیفتہ

حسرتِ آغوش ہے کیوں ہم کنار
غیر سے کب اس نے کنارا کیا

میر انیس

مرا رازِ دل آشکارا نہیں
وہ دریا ہوں جس کا کنارا نہیں

عرفان صدیقی

تو ادھر کس کو ڈبونے کے لیے آئی تھی
دیکھ اے موجِ بلاخیز، کنارا ہے کہ ہم

مجید امجد

دنیا کے اس بھنورسے جب ابھرے دکھوں کے بھید
اک اک اتھاہ بھید خود اپنا کنارا تھا

مصطفیٰ زیدی

کچے گھڑے نے جیت لی ندی چڑھی ہوئی
مضبوط کشتیوں کو کنارا نہیں ملا

الطاف حسین حالی

دیکھ اے امید کہ جو، ہم سے نہ تو کنارا
تیرا ہی رہ گیا ہے لے دے کے اک سہارا

عبید اللہ علیم

اب تو مل جاؤ ہمیں تم کہ تمہاری خاطر
اتنی دور آ گئے دنیا سے کنارا کرتے

غلام محمد قاصر

منظر میں کناروں سے باہر دریائے محبت بہتا ہے
اور پس منظر میں نیلے سے آنچل کا کنارا آنکھوں میں

حسرت موہانی

گر یہی ہے ستمِ یار تو ہم نے حسرتؔ
نہ کیا کچھ بھی جو دنیا سے کنارا نہ کیا

شکیل بدایونی

مجھے تجھ سے خاص نسبت میں رہین موجِ طوفاں
جنہیں زندگی تھی پیاری انہیں مل گیا کنارا
میں بتاؤں فرق ناصح جو ہے مجھ میں اور تجھ میں
مری زندگی تلاطم تری زندگی کنارا

اکبر حمیدی

سب چاہتے ہیں سطح سمندر پہ لکھے جائیں
پر جاتے ہیں ادھر کو کنارا ہے جس طرف

قتیل شفائی

ہر سیل اشک ساحل تسکیں ہے آج کل
دریا کی موج موج کنارا ہے ان دنوں