مرزا غالب

ہے مجھ کو تجھ سے تذکرۂِ غیر کا گلہ
ہر چند بر سبیلِ شکایت ہی کیوں نہ ہو

داغ دہلوی

رکھ دیا منہ پہ مرے ہاتھ شبِ وصل اس نے
بے حجابی کے لیے کام شکایت آئی

شیخ ابراہیم ذوق

کوئی ان تنگ دہانوں سے محبت نہ کرے
اور جو یہ تنگ کریں منہ سے شکایت نہ کرے

فیض احمد فیض

کیا کچھ نہ ملا ہے جو کبھی تجھ سے ملے گا
اب تیرے نہ ملنے کی شکایت نہ کریں گے

جون ایلیا

اب فقط عادتوں کی ورزش ہے
روح شامل نہیں شکایت میں

عرفان صدیقی

دل اگر دل ہے تو دریا سے بڑا ہونا ہے
سر اگر سر ہے تو نیزوں سے شکایت کیسی

احسان دانش

یہ تو نہیں کہ تم سے محبت نہیں مجھے
اتنا ضرور ہے کہ شکایت نہیں مجھے
دوبھر ہے گرچہ جور عزیزاں سے زندگی
لیکن خدا گواہ شکایت نہیں مجھے
احسانؔ کون مجھ سے سوا ہے مرا عدو
اپنے سوا کسی سے شکایت نہیں مجھے

حسرت موہانی

جو چاہو سزا دے لو تم اور بھی کھل کھیلو
پر ہم سے قسم لے لو کی ہو جو شکایت بھی
قصۂ غم نہ کہوں گا حسرتؔ
جور کی ان کے شکایت ہو گی
شکر جفا بھی اہل رضا نے کیا ادا
ان سے یہی نہیں کہ شکایت نہ ہو سکی

حفیظ ہوشیارپوری

اب مرا چپ چاپ رہنا امر مجبوری سہی
میں نے کھولی ہی زباں کب تھی شکایت کے لیے

شاد عظیم آبادی

مٹائیں تاکہ اپنے ظلم کرنے کی ندامت کو
نکالیں ڈھونڈ کر ہر طرح سے پہلو شکایت کا

شکیل بدایونی

اللہ تو سب کی سنتا ہے جرأت ہے شکیلؔ اپنی اپنی
حالیؔ نے زباں سے اف بھی نہ کی اقبالؔ شکایت کر بیٹھے
غم ہم نے خوشی سے مول لیا اس پر بھی ہوئی یہ نادانی
جب دل کی امیدیں ٹوٹ گئیں قسمت سے شکایت کر بیٹھے
محبت ہی میں ملتے ہیں شکایت کے مزے پیہم
محبت جتنی بڑھتی ہے شکایت ہوتی جاتی ہے
کر کے ستم کی پردہ پوشی ہم نے انہیں بے عیب کیا
ورنہ شکیلؔ اپنے ہونٹوں پر حرفِ شکایت آج بھی ہے
ہاتھوں سے دل کے چھوٹ گیا دامن امید
کیا مل گیا جواب شکایت نہ پوچھئے

فانی بدایونی

شکوۂ ہجر پہ سر کاٹ کے فرماتے ہیں
پھر کرو گے کبھی اس منہ سے شکایت میری

فراق گورکھپوری

دیکھ کر رنگ مزاجِ یار کیا کہیے فراقؔ
اس میں کچھ گنجائش شکر و شکایت بھی تو ہو
بیگانگی پر اس کی زمانے سے احتراز
در پردہ اس ادا کی شکایت کہاں کہاں
مطلب چشم مروت مجھے معلوم نہ تھا
تجھ کو مجھ سے تھی شکایت مجھے معلوم نہ تھا

محبوب خزاں

اتنے سماں اتنے شہر ایک لگن ایک لہر
سات برس چپ رہے اور شکایت ہے کیا