کتنا حسیں ہے خواب محبت نہ پوچھئے
شکیل بدایونی
شب کی بہار صبح کی ندرت نہ پوچھئے
کتنا حسیں ہے خواب محبت نہ پوچھئے
پھولوں کی غم رسیدہ مسرت نہ پوچھئے
ظاہر میں خندہ زن ہیں حقیقت نہ پوچھئے
وہ دن گئے کہ تھی مجھے پرسش کی آرزو
محبوب ہو کے اب مری حالت نہ پوچھئے
ہاتھوں سے دل کے چھوٹ گیا دامن امید
کیا مل گیا جواب شکایت نہ پوچھئے
دل کو نہ ہو گی تاب غمِ بے توجہی
للہ داستان محبت نہ پوچھئے
یوں دیکھتے ہیں جیسے ادھر دیکھتے نہیں
اس لطفِ بے غرض کی نزاکت نہ پوچھئے
مفعول فاعلات مفاعیل فاعِلن
مضارع مثمن اخرب مکفوف محذوف