مرزا غالب

وارستہ اس سے ہیں کہ محبت ہی کیوں نہ ہو
کیجے ہمارے ساتھ، عداوت ہی کیوں نہ ہو
چھوڑا نہ مجھ میں ضعف نے رنگ اختلاط کا
ہے دل پہ بار، نقشِ محبت ہی کیوں نہ ہو
ہم بھی دشمن تو نہیں ہیں اپنے
غیر کو تجھ سے محبت ہی سہی

بہادر شاہ ظفر

نہ کوہ کن ہے نہ مجنوں کہ تھے مرے ہمدرد
میں اپنا دردِ محبت کہوں تو کس سے کہوں
کیا تماشا ہے رگِ لیلٰی میں ڈوبا نیشتر
فصد مجنوں باعث جوشِ محبت کھل گئی

حیدر علی آتش

اے صنم جس نے تجھے چاند سی صورت دی ہے
اسی اللہ نے مجھ کو بھی محبت دی ہے

داغ دہلوی

کچھ لاگ کچھ لگاو محبت میں چاہیے
دونوں طرح کا رنگِ طبیعت میں چاہیے
وہ ابتدائے عشق میں حاصل ہوئی مجھے
جو بات انتہائے محبت میں چاہیے
وہ جو تجھ سے دوستی کرنے لگا
مجھ کو دشمن سے محبت ہو گئی
میرے دل سے غم ترا کیوں‌دور ہو
پاس رہنے کی محبت ہو گئی
داغ کا دم ہے غنیمت بزم میں
دو گھڑی کو گرم محبت ہو گئی
ابھی ہماری محبت کسی کو کیا معلوم
کسی کے دل کی حقیقت کسی کو کیا معلوم

شیخ ابراہیم ذوق

کیا غرض لاکھ خدائی میں ہوں دولت والے
ان کا بندہ ہوں جو بندے ہیں محبت والے
گئے جنت میں اگر سوزِ محبت والے
تو یہ جانو رہے دوزخ ہی میں جنت والے
کس مرض کی ہیں دوا یہ لب جاں بخش ترے
جاں بہ لب ہیں ترے آزار محبت والے
چاہیں گر چارہ جراحت کا محبت والے
بیچیں الماس و نمک سنگ جراحت والے
کوئی ان تنگ دہانوں سے محبت نہ کرے
اور جو یہ تنگ کریں منہ سے شکایت نہ کرے
یہ ذوقؔ مے پرست ہے یا ہے صنم پرست
کچھ ہے بلا سے لیک محبت پرست ہے

مصطفٰی خان شیفتہ

بس نہ فرماتے پھرو یہ شیفتہؔ
گو انہیں تم سے محبت ہو گئی

باقی صدیقی

زندگی داغِ محبت ہی سہی
آپ سے دور کی نسبت ہی سہی

جون ایلیا

زندگی کس طرح بسر ہو گی
دل نہیں لگ رہا محبت میں

خواجہ میر درد

مجھ کو تجھ سے جو کچھ محبت ہے
یہ محبت نہیں ہے آفت ہے

قمر جلالوی

دے دعا مجھ کو کہ تیرا نام دنیا بھر میں ہے
حسن کی شہرت نہیں ہوتی محبت کے بغیر
حضرتِ ناصح بجا ارشاد، گستاخی معاف
آپ سمجھاتے تو ہیں لیکن محبت کے بغیر
ہو کر عزیز مجھ کو ملاتے ہیں خاک میں
دنیا میں نام کو بھی محبت نہیں رہی
عدو کی شکایت سنے جا رہے ہو نہ برہم طبیعت نہ بل ابروؤں پر
نظر نیچی نیچی لبوں پر تبسم محبت نہیں ہے تو پھر اور کیا ہے
کبھی ہے جگر میں خلش، ہلکی ہلکی، کبھی درد پہلو میں ہے میٹھا میٹھا
میں پہروں شبِ غم یہی سوچتا ہوں محبت نہیں ہے تو پھر اور کیا ہے
ان کے لبوں پہ آج محبت کی بات ہے
اللہ خیر ہو کہ نئی واردات ہے

عرفان صدیقی

میں بھی گریاں ہوں اسی چوبِ شجر کی مانند
جس میں بھی جاگ اٹھے دردِ محبت ہی تو ہے
لاکھ راس آئے مگر کام ہے نادانی کا
تم مرے ماحصل کارِ محبت پہ نہ جاؤ
ہم ایسے ہوس کار نہیں جو نہ سدھر جائیں
تھوڑا سا مزہ کارِ محبت میں تو آئے

جمال احسانی

عشق میں خود سے محبت نہیں کی جا سکتی
پر کسی کو یہ نصیحت نہیں کی جا سکتی

احسان دانش

وہ بے پردہ حریم شاعری میں آتے جاتے ہیں
مرتب میری تاریخ‌‌ محبت ہوتی جاتی ہے
بہ ایں حالات مایوسی بہ ایں اوصاف محرومی
محبت ہے کہ محتاج محبت ہوتی جاتی ہے
یوں ہی تجدید پیمانِ وفا کیجے مرے ہم دم
بڑی آسان تشریح محبت ہوتی جاتی ہے
جسے تصویر کہنا کفر ہے آئین الفت میں
وہی تنویر معبود محبت ہوتی جاتی ہے
یہ تو نہیں کہ تم سے محبت نہیں مجھے
اتنا ضرور ہے کہ شکایت نہیں مجھے
میں اور دے سکوں نہ ترے غم کو زندگی
ایسی تو زندگی سے محبت نہیں مجھے

بیان میرٹھی

واشدہ غنچۂ خاطر مت مانگ
منتشر بوئے محبت ہوگی

زہرا نگاہ

ایک کے گھر کی خدمت کی اور ایک کے دل سے محبت کی
دونوں فرض نبھا کر اس نے ساری عمر عبادت کی
شہرت کے گہرے دریا میں ڈوبے تو پھر ابھرے نہیں
جن لوگوں کو اپنا سمجھا جن لوگوں سے محبت کی

جلیل مانک پوری

جاتے جاتے وہ یہی کر گئے تاکید جلیلؔ
دل میں رکھیے گا حفاظت سے محبت میری

حسرت موہانی

عشاق کے دلِ نازک اس شوخ کی خو نازک
نازک اسی نسبت سے ہے کارِ محبت بھی
ہر چند ہے دل شیدا حریت کامل کا
منظور دعا لیکن ہے قید محبت بھی
اور بھی ہو گئے بیگانہ وہ غفلت کر کے
آزمایا جو انہیں ضبط محبت کر کے
ان کو جو شغل ناز سے فرصت نہ ہو سکی
ہم نے یہ کہہ دیا کہ محبت نہ ہو سکی
پابوس کی بھی ہم کو اجازت نہ دے سکے
اتنی بھی تم سے قدرِ محبت نہ ہو سکی
کچھ قدر تو کرتے مرے اظہارِ وفا کی
شاید یہ محبت ہی نہیں آپ کے نزدیک

سیماب اکبر آبادی

جفا ان کی دل زود آشنا پر
بہ مقدار محبت ہو رہی ہے

شاد عظیم آبادی

کریں انصاف کا دعویٰ اثر کچھ بھی نہ ظاہر ہو
مزا چکھا ہے ایسے دوستوں سے بھی محبت کا
جسے دیکھا جسے پایا غرض کا اپنی بندہ تھا
جہاں میں اب مزا باقی نہیں خالص محبت کا

شکیل بدایونی

کوشش تو بہت کی ہم نے مگر پایا نہ غمِ ہستی سے مفر
ویرانیِ دل جب حد سے بڑھی گھبرا کے محبت کر بیٹھے
ہر چیز نہیں ہے مرکز پر اک ذرہ ادھر اک ذرہ ادھر
نفرت سے نہ دیکھو دشمن کو شاید وہ محبت کر بیٹھے
تقدیر کی گردش کیا کم تھی اس پر یہ قیامت کر بیٹھے
بے تابی دل جب حد سے بڑھی گھبرا کے محبت کر بیٹھے
نمایاں دونوں جانب شان فطرت ہوتی جاتی ہے
انہیں مجھ سے مجھے ان سے محبت ہوتی جاتی ہے
بیت گیا ہنگام قیامت روزِ قیامت آج بھی ہے
ترکِ تعلق کام نہ آیا ان سے محبت آج بھی ہے
یہ کیا ستم ظریفی فطرت ہے آج کل
بے گانگی شریک محبت ہے آج کل
غم ہے کہ ایک تلخ حقیقت ہے آج کل
دل ہے کہ سوگوار محبت ہے آج کل
گلشن ہو نگاہوں میں تو جنت نہ سمجھنا
دم بھر کی عنایت کو محبت نہ سمجھنا
نسبت ہی نہیں کوئی محبت کو خرد سے
اے دل کبھی مفہوم محبت نہ سمجھنا
ویرانی ماحول کو بربادیِ دل کو
ہر دور میں آثار محبت نہ سمجھنا
دیکھے جو تمہیں کوئی محبت کی نظر سے
للہ شکیلؔ اس کو محبت نہ سمجھنا
شب کی بہار صبح کی ندرت نہ پوچھئے
کتنا حسیں ہے خواب محبت نہ پوچھئے
دل کو نہ ہو گی تاب غمِ بے توجہی
للہ داستان محبت نہ پوچھئے

احمد فراز

سب لوگ لیے سنگِ ملامت نکل آئے
کس شہر میں ہم اہلِ محبت نکل آئے

فراق گورکھپوری

رسم و راہ دہر کیا جوشِ محبت بھی تو ہو
ٹوٹ جاتی ہے ہر اک زنجیر وحشت بھی تو ہو
آئی ہے کچھ نہ پوچھ قیامت کہاں کہاں
اف لے گئی ہے مجھ کو محبت کہاں کہاں
دیتے ہیں جام شہادت مجھے معلوم نہ تھا
ہے یہ آئین محبت مجھے معلوم نہ تھا
دردِ دل کیا ہے کھلا آج ترے لڑنے پر
تجھ سے اتنی تھی محبت مجھے معلوم نہ تھا

قتیل شفائی

وہ شخص کہ میں جس سے محبت نہیں کرتا
ہنستا ہے مجھے دیکھ کے نفرت نہیں کرتا

کلیم عاجز

بھلا آدمی تھا پہ نادان نکلا
سنا ہے کسی سے محبت کرے ہے
کرے ہے عداوت بھی وہ اس ادا سے
لگے ہے کہ جیسے محبت کرے ہے
ظالم تھا وہ اور ظلم کی عادت بھی بہت تھی
مجبور تھے ہم اس سے محبت بھی بہت تھی

محسن احسان

ماں نے تعویذ بھی باندھا مرے بازو پہ مگر
پھر بھی سر سے نہ یہ سودائے محبت اترا

محسن نقوی

ذکر شبِ فراق سے وحشت اسے بھی تھی
میری طرح کسی سے محبت اسے بھی تھی

میرا جی

دل میں ہر لحظہ ہے صرف ایک خیال
تجھ سے کس درجہ محبت ہے مجھے

نوح ناروی

جب ذکر کیا میں نے کبھی وصل کا ان سے
وہ کہنے لگے پاک محبت ہے بڑی چیز