مرزا غالب

جنوں تہمت کشِ تسکیں نہ ہو گر شادمانی کی
نمک پاشِ خراشِ دل ہے لذت زندگانی کی
سکوت و خامشی اظہارِ حال بے زبانی ہے
کمینِ درد میں پوشیدہ راز شادمانی ہے
وفورِ خود نمای رہنِ ذوقِ جلوہ آرائ
بہ وہم کامرانی جذبِ دل کی شادمانی ہے

اختر شیرانی

کہیں سے ہاتھ آ جائے تو ہم کو بھی کوئی لا دے
سنا ہے اس جہاں میں شادمانی اب بھی ہوتی ہے
کوئی خوش ہو مری مایوسیاں فریاد کرتی ہیں
الٰہی کیا جہاں میں شادمانی اب بھی ہوتی ہے

تلوک چند محروم

دلِ ناشادماں کو اور بھی ناشاد کرنے کو
دلِ ناشادماں کی شادمانی یاد آتی ہے

ثروت حسین

رنج کی ریت ہے کناروں پر
موج گزری تھی شادمانی کی

جوش ملیح آبادی

جب سے مرنے کی جی میں ٹھانی ہے
کس قدر ہم کو شادمانی ہے
کوئی صدمہ ضرور پہنچے گا
آج کچھ دل کو شادمانی ہے

حسرت موہانی

نہ صورت کہیں شادمانی کی دیکھی
بہت سیر دنیائے فانی کی دیکھی

سیماب اکبر آبادی

افسوس گزر گئی جوانی
وہ لمحۂ کیف و شادمانی