مرزا غالب

دکھاؤں گا تماشہ ، دی اگر فرصت زمانے نے
مرا ہر داغِ دل ، اک تخم ہے سروِ چراغاں کا
اثر آبلہ سے ، جادۂِ صحرائے جنوں
صورتِ رشتۂِ گوہر ہے چراغاں مجھ سے
مدت ہوئی ہے یار کو مہماں کیے ہوئے
جوشِ قدح سے بزم چراغاں کیے ہوئے
پھر گرمِ نالہ ہائے شرر بار ہے نفس
مدت ہوئی ہے سیرِ چراغاں کیے ہوئے

حیدر علی آتش

آتش عشق سے ہے داغ سراپا میرا
آدمی سروِ چراغاں نہ ہوا تھا سو ہوا

خواجہ میر درد

تجھے اے شمع کیا دیکھیں زمانے کو دکھانا ہے
ہمیں جوں کاغذ آتش زدہ اور ہی چراغاں کو

عرفان صدیقی

پاسداروں کا سرا پردۂ دولت پہ ہجوم
سلسلے چھت کی فصیلوں پہ چراغاں والے

مصطفی زیدی

ہر اک اہل لہو نے بازی ایماں لگا دی ہے
جو اب کی بار ہو گا وہ چراغاں دیکھتے رہنا

احسان دانش

برق ناکام مہ و مہر کواکب مایوس
نہ ہوا میرے نشیمن میں چراغاں نہ ہوا

اسرار الحق مجاز

ماہ و انجم بھی ہوں شرمندۂ تنویر مجازؔ
دشت ظلمات میں اک ایسا چراغاں کر دیں

بہزاد لکھنوی

داغوں کا قلب‌ زار سے ممکن تو ہے علاج
ان کے ہی دم سے دل میں چراغاں ہے کیا کروں

زہرا نگاہ

عجیب بات ہے ان تیرگی کی راہوں میں
نفس نفس میں چراغاں ہے دیکھیے کیا ہو

ظہیر کاشمیری

آج کی شب تو بجھا رکھے ہیں یادوں کے چراغ
آج کی شب مری پلکوں پہ چراغاں کیوں ہے

علی سردار جعفری

آسمانوں سے برستا ہے اندھیرا کیسا
اپنی پلکوں پہ لیے جشنِ چراغاں چلیے

سیف الدین سیف

دل فطرتِ شناس آخر کہیں یوں ہی دھڑکتا ہے
فریب حسن ہے جشنِ چراغاں ہم نہ کہتے تھے

شکیل بدایونی

تری یادوں سے دل فروزاں کریں گے
پھر اس غم کدے میں چراغاں کریں گے

قابل اجمیری

کچھ اور بڑھ گئی ہے اندھیروں کی زندگی
یوں بھی ہوا ہے جشنِ چراغاں کبھی کبھی
ہستی کو اپنی شعلہ بداماں کریں گے ہم
زنداں میں بھی گئے تو چراغاں کریں گے ہم

مجروح سلطان پوری

جاؤ تم اپنے بام کی خاطر ساری لویں شمعوں کی کتر لو
زخم کے مہر و ماہ سلامت جشنِ چراغاں تم سے زیادہ