مرزا غالب

عمر ہر چند کہ ہے برق خرام
دل کے خوں کرنے کی فرصت ہی سہی

بہادر شاہ ظفر

نہ مجھ کو کہنے کی طاقت کہوں تو کیا احوال
نہ اس کو سننے کی فرصت کہوں تو کس سے کہوں

حیدر علی آتش

تیغ بے آب ہے نے بازوئے قاتل کمزور
کچھ گراں جانی ہے کچھ موت نے فرصت دی ہے
میں نے کہا کبھی تو تشریف لاؤ بولے
معذور رکھیے وقت فرصت نہیں ہے کوئی

مصحفی غلام ہمدانی

گر اے قاصد تو اس کے روبرو جاوے اشارے سے
دعا میری بھی اس معشوق کم فرصت سے کہہ دیجو

جون ایلیا

شیشے کے اس طرف سے میں سب کو تک رہا ہوں
مرنے کی بھی کسی کو فرصت نہیں ہے مجھ میں

قمر جلالوی

کوئی دم کا مہماں ہے بیمارِ فرقت تم ایسے میں بے کار بیٹھے ہوئے ہو
پھر اس پر یہ کہتے ہو فرصت نہیں ہے یہ فرصت نہیں ہے تو پھر اور کیا ہے

احسان دانش

جو کچھ گزر رہی ہے غنیمت ہے ہم نشیں
اب زندگی پہ غور کی فرصت نہیں مجھے

جوش ملیح آبادی

مجھ کو تعلیم سے فرصت ہی کہاں اے شبیرؔ
کہہ لیا شعر کوئی جب کبھی فرصت دیکھی

حسرت موہانی

جھکی ہے ترے بار عرفاں سے گردن
ہمیں سر اٹھانے کی فرصت نہیں ہے
ان کو جو شغل ناز سے فرصت نہ ہو سکی
ہم نے یہ کہہ دیا کہ محبت نہ ہو سکی

حفیظ ہوشیارپوری

گلشن آباد جہاں میں صورت شبنم حفیظؔ
ہم اگر روئے بھی تو رونے کی فرصت کے لیے

فانی بدایونی

ہر لمحۂ حیات رہا وقف کار شوق
مرنے کی عمر بھر مجھے فرصت نہیں رہی

شاذ تمکنت

بس اک کیفیت خود رفتگی تنہائیاں اپنی
ہمیں ملتی ہے فرصت بھی تو فرصت ایسی ہوتی ہے

فراق گورکھپوری

یہ ترے جلوے یہ چشمِ شوق کی حیرانیاں
برقِ حسنِ یار نظارے کی فرصت بھی تو ہو

کلیم عاجز

کیا دور غزل تھا کہ لہو دل میں بہت تھا
اور دل کو لہو کرنے کے فرصت بھی بہت تھی

محبوب خزاں

اب یہ توجہ ہے کیوں میرے شب و روز پر
اپنے شب و روز سے آپ کو فرصت ہے کیا

میرا جی

تیز ہے وقت کی رفتار بہت
اور بہت تھوڑی سی فرصت ہے مجھے