مرزا غالب

درکار ہے شگفتن گلہائے عیش کو
صبحِ بہار پنبۂِ مینا کہیں جسے
گو ہاتھ کو جنبش نہیں آنکھوں میں تو دم ہے !
رہنے دو ابھی ساغر و مینا مرے آگے

حیدر علی آتش

دل کے لیے ہے عشق تو دل عشق کی خاطر
مے ہے تو یہ ہے اور جو مینا ہے تو یہ ہے

مصحفی غلام ہمدانی

کیوں نہ چھکے دل دیکھ کے اس کو جس ساقی کا ہووے یارو
دستِ نگاریں پنجۂِ مرجاں ساعدِ سیمیں گردن مینا
اس نے مزا کیا پایا ہو گا دو چلو مے پینے کا یاں
جس میکش کے ہاتھ نہ آیا غبغب ساغر ساعد مینا

مصطفٰیٰ خان شیفتہ

میں کمینِ توبہ میں ہوں آپ، لیکن کیا کروں
منہ میں بھر آتا ہے پانی جام و مینا دیکھ کر

رئیس فروغؔ

میں جھوٹے ملہار سنوں
ایک سیانی مینا سے

ظہیر کاشمیری

ہمارے پاس کوئی گردشِ دوراں نہیں آتی
ہم اپنی عمر فانی ساغر و مینا میں رکھتے ہیں

جوش ملیح آبادی

جب جھوم کے مینا کو اٹھاتا ہوں گھٹا میں
ہلتا ہے سر گنبد مینا مرے آگے

حسرت موہانی

ان کی نگہ مست کے جلوے ہیں نظر میں
بھولے سے بھی ذکرِ مے و مینا نہیں آتا

سیماب اکبر آبادی

مل چکے ہیں خاک میں جو ٹوٹ کر پھولوں کے جام
ان کو دست شاخ میں پھر ساغر و مینا کریں

شاد عظیم آبادی

کسی بدمست کی یاد آ گئیں آنکھیں ساقی
جب چھلکتا ہوا آگے مرے مینا آیا
لے کے خود پیرِ مغاں ہاتھ میں مینا آیا
مے کشو شرم کہ اس پر بھی نہ پینا آیا
یہ بزمِ مے ہے یاں کوتاہ دستی میں ہے محرومی
جو بڑھ کر خود اٹھا لے ہاتھ میں مینا اسی کا ہے
ساقی بغیر احوال یہ پہنچا ہے مے خانہ کا اب
جام اک طرف ہے سرنگوں خالی ہے مینا اک طرف

عزیز حامد مدنی

لب جلتے ہیں مے خواروں کے سینے نہیں جلتے
اس درجہ خنک شعلۂ مینا بھی نہیں تھا

فراق گورکھپوری

ساقی مجھے بھی یاد ہیں وہ تشنہ کامیاں
جن کو حریف ساغر و مینا بنا دیا