مرزا غالب

زبسکہ مشقِ تماشا جنوں علامت ہے
کشاد و بستِ مژہ ، سیلی ندامت ہے

بہادر شاہ ظفر

دل اس کو آپ دیا آپ ہی پشیماں ہوں
کہ سچ ہے اپنی ندامت کہوں تو کس سے کہوں

مصطفٰی خان شیفتہ

عشق کی میرے جو شہرت ہو گئی
یار سے مجھ کو ندامت ہو گئی

جون ایلیا

سر ہی اب پھوڑیے ندامت میں
نیند آنے لگی ہے فرقت میں

عرفان صدیقی

آستیں پر کوئی دھبہ تو نہیں ہے ، لیکن
اس کی آنکھوں میں بہرحال ندامت ہے وہی
پانی نہ پائیں ساقی کوثر کے اہلِ بیت
موج فرات اشکِ ندامت کہاں سے لائے

احسان دانش

میں جتنا ان کے اسباب جفا پر غور کرتا ہوں
مجھے اپنی وفاؤں پر ندامت ہوتی جاتی ہے
ارے توبہ گناہوں کے سیہ خوابوں سے بیداری
کہ آنکھیں کھلتی جاتی ہیں ندامت ہوتی جاتی ہے

حسرت موہانی

شہیدان غم ہیں سبک روح کیا کیا
کہ اس دل پہ بار ندامت نہیں ہے

حفیظ ہوشیارپوری

استقامت اے مرے دیر آشنائے غم گسار
ایک آنسو ہے بہت حسن ندامت کے لیے

شکیل بدایونی

عرضِ تمنا کر کے گنوایا ہم نے بھرم خودداری کا
ہو گئی گو تکمیل تمنا دل کو ندامت آج بھی ہے
میری وفا ہی میرے لیے قہر بن گئی
اپنی وفا پہ ان کو ندامت ہے آج کل

فانی بدایونی

تیری قدرت کا نظارہ ہے مرا عجز گناہ
تیری رحمت کا اشارہ ہے ندامت میری

شاذ تمکنت

کہاں اپنی سیہ کاری کہاں یہ تیری معصومی
تجھے دیکھا نہیں جاتا ندامت ایسی ہوتی ہے

فراق گورکھپوری

دنیا سے اے دل اتنی طبیعت بھری نہ تھی
تیرے لیے اٹھائی ندامت کہاں کہاں

قابل اجمیری

اس کے وعدے پہ ناز تھے کیا کیا
اب در و بام سے ندامت ہے