مرزا غالب

سامنا حور و پری نے نہ کیا ہے ، نہ کریں
عکس تیرا ہی مگر، تیرے مقابل آئے

حیدر علی آتش

تیرے دانتوں سے جو ہونے کو مقابل جاتا
صورت اشک گہر خاک میں مل مل جاتا

مصحفی غلام ہمدانی

تھا روئے دل خستہ تو شب میری طرف کو
کب ہو گیا مژگاں کے مقابل نہیں معلوم

مصطفٰیٰ خان شیفتہ

اہلِ وحشت کو مری شورش سے لازم ہے خطر
میں وہ مجنوں ہوں کہ مجنوں کے مقابل ہو گیا

فیض احمد فیض

سب قتل ہو کے تیرے مقابل سے آئے ہیں
ہم لوگ سرخرو ہیں کہ منزل سے آئے ہیں

باقی صدیقی

ہر نقش اک خراش ہے ، ہر رنگ ایک داغ
تصویر آئنے کے مقابل گئی ہے پھر

قمر جلالوی

قمر کے سامنے شب بھر سنوارو شوق سے گیسو
وہ آئینہ نہیں ہے کہ ہٹ جائے مقابل سے

عرفان صدیقی

میرے اندر ابھی محفوظ ہے اک لوحِ طلسم
اک طلسم اور ابھی میرے مقابل ہے تو کیا

اسرار الحق مجاز

کرشمہ سازی دل دیکھتا ہوں
تمہیں اپنے مقابل دیکھتا ہوں

بہزاد لکھنوی

اے جذبۂ دل گر میں چاہوں ہر چیز مقابل آ جائے
منزل کے لیے دو گام چلوں اور سامنے منزل آ جائے
اے برقِ تجلی کوندھ ذرا کیا مجھ کو بھی موسیٰ سمجھا ہے
میں طور نہیں جو جل جاؤں جو چاہے مقابل آ جائے
ہائے اس وقت دلِ زار کا عالم کیا ہو
گر محبت ہی محبت کے مقابل ہو جائے

علی سردار جعفری

دیکھتے رہیے کہ ہو جائے نہ کم شان جنوں
آئنہ بن کے خود اپنے ہی مقابل رہیے

تلوک چند محروم

حیرت زدہ میں ان کے مقابل میں رہ گیا
جو دل کا مدعا تھا مرے دل میں رہ گیا

حفیظ ہوشیارپوری

یا خلا پر حکمراں یا خاک کے اندر نہاں
زندگی ڈٹ کر عناصر کے مقابل آ گئی

شکیل بدایونی

کوئی پردۂ راز حائل نہیں ہے
ستم ہے وہ پھر بھی مقابل نہیں ہے
کسی کو جب نگاہوں کے مقابل دیکھ لیتا ہوں
تو پہلے سر جھکا کے حالتِ دل دیکھ لیتا ہوں

فانی بدایونی

بجلیاں ٹوٹ پڑیں جب وہ مقابل سے اٹھا
مل کے پلٹی تھیں نگاہیں کہ دھواں دل سے اٹھا
آئینہ و دل دونوں کہنے ہی کی باتیں تھیں
تیری ہی تجلی تھی اور تو ہی مقابل تھا