تسلی جانِ بلبل کے لیے خندیدنِ گل ہے
مرزا غالب
نمائش پردہ دارِ طرز بیدادِ تغافل ہے
تسلی جانِ بلبل کے لیے خندیدنِ گل ہے
نمود عالمِ اسباب کیا ہے ؟ لفظِ بے معنی
کہ ہستی کی طرح مجھ کو عدم میں بھی تامل ہے
نہ رکھ پابندِ استغنا کو قیدی رسمِ عالم کا
ترا دستِ دعا بھی رخنہ اندازِ توکل ہے
نہ چھوڑا قید میں بھی وحشیوں کو یادِ گلشن نے
یہ چاکِ پیرہن گویا جوابِ خندۂِ گل ہے
ابھی دیوانگی کا راز کہہ سکتے ہیں ناصح سے
ابھی کچھ وقت ہے غالب ابھی فصلِ گل و مل ہے