راجا پرجا
مجید امجد
راجے کا کل آج!
سارا جہاں محتاج
سکھ، دھن، باج، خراج
گدی، مسند، تاج
تیس برس کا راج
اور پھر اس کے بعد
اک روضہ ویراں
پرجا کا آج نہ کل
شاخ نہ پھول، نہ پھل
بھٹکے دل کا دل
بھوکا، پیاسا، شل
لاکھ برس کا پل
اور پھر اس کے بعد
مٹتے گورستاں
راجا پرجا کہاں؟
اک بہتا طوفاں
کوہِ عظیم و گراں
کاہِ سبک ساماں
جھونپڑیاں، ایواں
نغمہ اور فغاں
ہر شے اس میں رواں
ہر شے اس میں نہاں
اور پھر اس کے بعد
ایک وہی طوفاں