بکھرے بکھرے ، تیرہ تیرہ، چاک چاک

سینۂ ہستی کی آہ دردناک

ریڈیو گرمِ سخن، محوِ بیاں

خون کے چھینٹے ، لہو کی بوندیاں

چند کان اعلانچی کی بات پر

مرتکز اخبار کے صفحات پر

کتنے دکھڑوں کے صدا پیکر حروف

کتنے اندھے گیانی، بہرے فیلسوف!

کیا ہے رقصِ گردشِ ایام، کیا!

کیا ہے اس افسانے کا انجام، کیا؟

چھت کے نیچے ، روزنوں کے درمیان

کالے پارے کی مرقص پتلیاں

خفتہ ہے ان کاغذوں کی سطح پر

کتنے نخچیروں کی آہوں کے شرر

کتنے کرگس، جن کو مرداروں کی بو

چھت کے نیچے ، مضطرب، نظارہ خو

یہ کبوتر، دیکھتے تھکتے نہیں

یہ مفکر کچھ سمجھ سکتے نہیں!