بھائی، اتنی جلدی کیا تھی۔۔۔

کب سورج کے تھال پہ آ کر ٹھہرے تھوڑی دیر کو کالے چاند کا لرزاں دھبا

اچانک چک چک چکراتا گزرے وہ چھوٹا سا اک رکشا

سامنے آتا، دور سے دکھتا رکشا

وہ سورج کی آنکھ، اور اس میں چاند اک کالی پتلی، اور پھر اس پتلی کے گرد لڑھکتا

پھر یہ سب کچھ عکس بہ عکس ہماری آنکھ کی پتلی میں بھی

اوہو اب تو آنکھیں بھی دکھتی ہیں

سنا ہے تم تو اک دن پہلے کسی سدیمی دوری کے نزدیک خلا میں، وہیں کہیں تھے

جانے اک دن پہلے ہی تم کیوں لوٹ آئے ، بھائی اتنی جلدی کیا تھی۔۔۔

ایسے میں جب ہوں اک سیدھ میں تین کرے اور تین زمانے ۔۔۔