ہم تارے ، چاند ستارے ہیں
مجید امجد
ہم تارے ہیں
ہم تارے ، راج دلارے ہیں
ہم تارے ، چاند ستارے ہیں
خوش خصلت ہیں، خوش طینت ہیں
ہم اس پرچم کی زینت ہیں
ہم جگ مگ کرتے تارے ہیں
ہم تارے ، چاند ستارے ہیں
ان پیلے سبز دیاروں میں
اس دنیا کے اندھیاروں میں
ہم روشنیوں کے سہارے ہیں
ہم تارے ، چاند ستارے ہیں
ہم پھول اور باس اور ہریالی
ہم علم اور امن اور خوش حالی
ہم پاک وطن کے دلارے ہیں
ہم تارے ، چاند ستارے ہیں
اس جیتے دیس میں جینا ہے
خوشیوں کا امرت پینا ہے
یہ باغ، یہ پھول ہمارے ہیں
ہم تارے ، چاند ستارے ہیں