حیثیت کیا مری اکائی کی
بشیر بدر
عظمتیں سب تری خدائی کی
حیثیت کیا مری اکائی کی
مرے ہونٹوں کے پھول سوکھ گئے
تم نے کیا مجھ سے بے وفائی کی
سب مرے ہاتھ پاؤں لفظوں کے
اور آنکھیں بھی روشنائی کی
میں ہی ملزم ہوں میں ہی منصف ہوں
کوئی صورت نہیں رہائی کی
اک برس زندگی کا بیت گیا
تہ جمی ایک اور کائی کی
اب ترستے رہو غزل کے لیے
تم نے لفظوں سے بے وفائی کی
فاعِلاتن مفاعِلن فِعْلن
خفیف مسدس مخبون محذوف مقطوع