امام بخش ناسخ

مجھ کو فرقت کی اسیری سے رہائی ہوتی
کاش عیسیٰ کے عوض موت ہی آئی ہوتی

داغ دہلوی

اس نے صدقے میں‌کیے آج ہزاروں آزاد
دیکھئے ہوتی ہے عاشق کی رہائی کیوں کر
اس نے صدقے میں کیے آج ہزاروں آزاد
دیکھیے ہوتی ہے عاشق کی رہائی کیونکر

شیخ ابراہیم ذوق

میں ہوں وہ صید کہ پھر دام میں پھنستا جا کر
گر قفس سے مجھے صیاد رہائی دیتا

مصحفی غلام ہمدانی

پھنسے صیاد کے پھندے میں بے طرح
ہماری اب رہائی ہو چکی بس

مصطفٰی خان شیفتہ

تم کو اندیشۂِ گرفتاری
یاں توقع نہیں رہائی کی

باقی صدیقی

زنجیر ہوس دل کو رہائی نہیں دیتی
کیا جلتی ہوئی آگ دکھائی نہیں دیتی

عرفان صدیقی

جلنے سے رہائی دے تو جانوں
اے چاند، دکھائی دے تو جانوں

الطاف حسین حالی

دل رہا پائے بند الفت دام
تھی عبث آرزو رہائی کی

بشیر بدر

میں ہی ملزم ہوں میں ہی منصف ہوں
کوئی صورت نہیں رہائی کی
ہم غریب لوگوں کے آج بھی وہی دن ہیں
پہلے کیا اسیری تھی آج کیا رہائی دی
غلامی کو برکت سمجھنے لگیں
اسیروں کو ایسی رہائی نہ دے

عبید اللہ علیم

میں ایک سے کسی موسم میں رہ نہیں سکتا
کبھی وصال کبھی ہجر سے رہائی دے

تلوک چند محروم

غافل نہ تجھ سے اے غم عقبیٰ تھے ہم مگر
دام غمِ جہاں سے رہائی نہ ہو سکی

حسرت موہانی

دام سے ان کے چھوٹنا تو کہاں
یاں ہوس بھی نہیں رہائی کی

شاد عظیم آبادی

سوچ ناحق ہے اسیرانِ قفس کے دل کو
کیا پڑی تھی جو کوئی فکر رہائی کرتا
کانپتے ہاتھوں سے کھلتا نہ قفس اے صیاد
کاش منظور بھی تو میری رہائی کرتا

احمد فراز

پھر قفس میں شور اٹھا قیدیوں کا اور صیاد
دیکھنا اڑا دے گا پھر خبر رہائی کی

اقبال ساجد

عجب صدا یہ نمائش میں کل سنائی دی
کسی نے سنگ سے تصویر کو رہائی دی

شاذ تمکنت

نکل کے دیکھا قفس سے تو آنکھ بھر آئی
وہ فصلِ گل کہ کھڑی تھی مری رہائی تک