مرزا غالب

اسدؔ! یہ عجز و بے سامانی فرعون توام ہے
جسے تو بندگی کہتا ہے دعویٰ ہے خدائی کا

امام بخش ناسخ

گر نہ ہو شمع تو معدوم ہیں پروانے بھی
تو نہ ہوتا تو صنم کب یہ خدائی ہوتی

انشاء اللہ خان انشا

شیخ و برہمن دیر و حرم میں ڈھونڈتے ہو کیا لا حاصل
موند کے آنکھیں دیکھو تو ہے ساری خدائی سینہ میں

بہادر شاہ ظفر

اللٰہ اللٰہ رے ان بتوں کا غرور
یہ خدائی نہیں تو پھر کیا ہے

حیدر علی آتش

نہیں دیکھا ہے لیکن تجھ کو پہچانا ہے آتشؔ نے
بجا ہے اے صنم جو تجھ کو دعویٰ ہے خدائی کا

داغ دہلوی

اس طرح اہل ناز ناز کریں
بندگی ہے کہ یہ خدائی ہے
تم دل آزار و ستم گر نہیں میں نے مانا
مان جائے گی اسے ساری خدائی کیونکر
اللٰہ اللٰہ بتوں کو ہے یہ دستِ قدرت
ان کی مٹھی میں رہی ساری خدائی کیونکر

شیخ ابراہیم ذوق

منہ سے بس کرتے کبھی یہ نہ خدا کے بندے
گر حریصوں کو خدا ساری خدائی دیتا

مصحفی غلام ہمدانی

تیغِ جفا لی میان سے اپنے جب اس جان کے دشمن نے
سر کو جھکا کر اپنے اپنے ، ساری خدائی بیٹھ گئی

یگانہ چنگیزی

خداؤں کی خدائی ہو چکی بس
خدارا بس دہائی ہو چکی بس
پڑے ہو کون سے گوشے میں تنہا
یگانہؔ کیوں خدائی ہو چکی بس

قمر جلالوی

گلہ بے وفائی کا کس سے کریں ہم ہمارا گلہ کوئی سنتا نہیں ہے
خدا تم کو رکھے جوانی کے دن ہیں تمھارا زمانہ تمھاری خدائی
وہ یکتا حسن میں ہو کر کہیں آگے نہ بڑھ جائیں
خدا بننے میں کیا ہے جب کہ قبضہ میں خدائی ہے

الطاف حسین حالی

غالب آتا ہے نفس دوں یا شرع
دیکھنی ہے تری خدائی آج

بشیر بدر

آسماں زمیں رکھ کر دونوں ایک مٹھی میں
اک ذرا سی لڑکی نے پیار کی خدائی دی
عظمتیں سب تری خدائی کی
حیثیت کیا مری اکائی کی
خدا ہم کو ایسی خدائی نہ دے
کہ اپنے سوا کچھ دکھائی نہ دے

عبید اللہ علیم

گدائے کوئے سخن اور تجھ سے کیا مانگے
یہی کہ مملکت شعر کی خدائی دے

ماجد صدیقی

ذرا سا ہم پہ تھا الزام حق سرائی کا
ہماری سمت ہوا رخ بھری خدائی کا

تلوک چند محروم

منکر ہزار بارِ خدا سے ہوا بشر
اک بار بھی بشر سے خدائی نہ ہو سکی

جوش ملیح آبادی

مری بارگاہ ہستی ہمہ عجز بندگانہ
مری بارگاہ مستی ہمہ سطوت خدائی

شاد عظیم آبادی

میں جو حاصل ترے کوچے کی گدائی کرتا
بندگی کہتے ہیں کس شے کو خدائی کرتا

عزیز حامد مدنی

دلوں کی عقدہ کشائی کا وقت ہے کہ نہیں
یہ آدمی کی خدائی کا وقت ہے کہ نہیں

فانی بدایونی

کون دل ہے جو دردمند نہیں
کیا ترے درد کی خدائی ہے

احمد فراز

ایسا نادان خریدار بھی کوئی ہو گا
جو ترے غم کے عوض ساری خدائی لے لے
میری خاطر نہ سہی اپنی انا کی خاطر
اپنے بندوں سے تو پندارِ خدائی لے لے

شاذ تمکنت

اس آئینہ کا تو اب ریزہ ریزہ چبھتا ہے
یہ آئینہ جسے تکتی رہی خدائی تک