امام بخش ناسخ

میں غش سے اس کے چھڑکتے ہی ہوشیار ہوا
کسی صنم کا پسینہ ہے یہ گلاب نہیں

انشاء اللہ خان انشا

عرق بہار شراب ہے وہ ہی آج چھڑکیں گے آپ پر
نہ تو بید مشک ہے اس گھڑی نہ تو کیوڑا نہ گلاب ہے
جو بھرا شیشہ تھا ہوا خالی
پر وہ بوئے گلاب باقی ہے

حیدر علی آتش

ہے جب سے دستِ یار میں ساغرِ شراب کا
کوڑے کا ہو گیا ہے کٹورا گلاب کا
صیاد نے تسلی بلبل کے واسطے
کنجِ قفس میں حوض بھرا ہے گلاب کا
اللٰہ رے ہمارا تکلف شبِ وصال
روغن کے بدلے عطر جلایا گلاب کا
معمور جو ہوا عرق رخ سے وہ ذقن
مضمون مل گیا مجھے چاہ گلاب کا

مصحفی غلام ہمدانی

اللٰہ رے ترے پسینے کی بو
کب ایسی بھبھک گلاب میں ہے

میر مہدی مجروح

غالبؔ آئے ہیں لاؤ اے مجروحؔ
بادۂ ناب میں ملا کے گلاب

میر انیس

عجب نہیں ہے جو شیشوں میں بھر کے لے جائیں
ان آنسوؤں کو فرشتے گلاب سمجھے ہیں

سراج الدین ظفر

شاید رخ حیات سے سرکے نقاب اور
بھر دو مرے سبو میں شراب گلاب اور
مخمور بوئے زلف نہ آئیں گے ہوش میں
چھڑکے ابھی نسیم بہاراں گلاب اور

عبدالحمید عدم

خار کی نوک کو لہو دے کر
انتظار گلاب کرتے ہو

قمر جلالوی

بنتا نہیں ہے حسن ستمگر شباب میں
ہوتے ہیں ابتدا ہی سے کانٹے گلاب میں

احسان دانش

جو دے رہے ہو زمیں کو وہی زمیں دے گی
ببول بوئے تو کیسے گلاب نکلے گا

اختر شیرانی

یہ کس کے رنگِ رخ بہاریں نے بخش دی ہے طراوت نو
شگفتہ ہوتا نہ تھا گلستاں میں اس ادا سے گلاب پہلے

بشیر بدر

پھر اس کے بعد نظارے نظر کو ترسیں گے
وہ جا رہا ہے خزاں کے گلاب دے جاؤ

غلام محمد قاصر

ہر پتا نا آسودہ ہے ماحول چمن آلودہ ہے
رہ جائیں لرزتی شاخوں پر دو چار گلاب تو اچھا ہو

رسا چغتائی

رات کاٹوں کسی خرابے میں
منہ اندھیرے گلاب بھی دیکھوں

اختر ہوشیارپوری

میں حرف دیکھوں کہ روشنی کا نصاب دیکھوں
مگر یہ عالم کہ ٹہنیوں پر گلاب دیکھوں

احمد فراز

بدن میں آگ سی چہرہ گلاب جیسا ہے
کہ زہرِ غم کا نشہ بھی شراب جیسا ہے
تم آ جاتے تو اس رات کی عمر بھی لمبی ہو جاتی
ابھی تھا دیواروں پر سبزہ ابھی تھا صحن گلاب بھرا
بہار آئی ہے تم بھی آؤ ادھر سے گزرو
کہ دیکھنا چاہتے ہیں تم کو گلاب سارے

امیر مینائی

کچھ ربط حسن و عشق سے جائے عجب نہیں
بلبل بنے جو بلبلہ اٹھے گلاب میں

شاذ تمکنت

مری نگاہ میں رنگوں کی دھوپ چھاؤں سی تھی
ہجومِ گل میں وہ کیا تھا گلاب جیسا تھا

قتیل شفائی

جلا گیا مجھے اپنے بدن کی ٹھنڈک سے
وہ جس کا رنگ دہکتے گلاب جیسا ہے

محسن نقوی

جب ہجر کے شہر میں دھوپ اتری میں جاگ پڑا تو خواب ہوا
مری سوچ خزاں کی شاخ بنی ترا چہرہ اور گلاب ہوا

ناصر کاظمی

آج ہم نے تمام حسنِ بہار
ایک برگِ گلاب میں دیکھا