امام بخش ناسخ

رات بھر جو سامنے آنکھوں کے وہ مہ پارہ تھا
غیرت مہتاب اپنا دامن نظارہ تھا
تو نے آنکھیں پھیر لیں یاں کام آخر ہو گیا
طائرِ جاں پائے بند رشتۂِ نظارہ تھا

حیدر علی آتش

ہے جو حسرت تو سراپا چشم ہونے کی ہمیں
حاصل اس آئینہ خانہ میں فقط نظارہ تھا
نقاب الٹ کے جو منہ عاشقوں کو دکھلاتے
تمہیں کہو کہ تمہارا نظارہ کیا کرتا
بہار تھی جو وہ گل چہرہ یار بھی ہوتا
اکیلے جا کے چمن کا نظارہ کیا کرتا

یگانہ چنگیزی

صورت ظاہری اک پردۂ تاریک تھی یاسؔ
حسن معنی کا کن اکھیوں سے نظارہ ہوتا

رئیس فروغؔ

سمندروں میں ستاروں کی آگ پھیلی ہے
مہک رہا ہے لہو لذت نظارہ میں
کسی قدیم نگر کا کوئی نظارہ ملے
گزر گئی جو مری زندگی دو بارہ ملے

اختر ہوشیارپوری

جب وہ پودوں کو پانی دیتا تھا
پس منظر اور نظارہ ایک ہوئے

قتیل شفائی

جو تیری دید نے بخشے وہی ہیں زخم بہت
اب اپنے دل میں کوئی حسرت نظارہ نہیں