امام بخش ناسخ

نظر سے تھا شرر سنگ کی طرح جو نہاں
وہ بت ملا مجھے اک بت شکن کے پردے میں

حیدر علی آتش

عالم ان ابروؤں کی کجی کا جو ہے سو ہے
بل کھا رہی ہے زلفِ شکن در شکن ہنوز
بناوٹ کیف مے سے کھل گئی اس شوخ کی آتشؔ
لگا کر منہ سے پیمانے کو وہ پیماں شکن بگڑا
گلشن حسن سے بہتر کوئی گل زار نہیں
سنبل اس طرح کا پر پیچ و شکن ہے کس کا

شیخ ابراہیم ذوق

دکھلاتا آسماں سے ہے روئے زمیں کی سیر
اے رشکِ ماہ تیری جبیں کا شکن مجھے
رکھتا ہے چشم لطف پہ کس کس ادا کے ساتھ
دیتا ہے جام ساقی پیماں شکن مجھے
ہے جذبِ دل درست تو چاہ فراق سے
کھینچے گی تیری زلفِ شکن در شکن مجھے

مصحفی غلام ہمدانی

تاب آزردگی کب ہے دلِ عاشق کو یہاں
چین پیشانی سے پڑتی ہے شکن آئنے میں
تھے خط شکستہ کی رخسار ترے تعلیم
از بس کہ ہجوم ان پر زلفوں کی شکن کا تھا

سراج الدین ظفر

ہاتھ مے خواروں کے بے قصد اٹھے تھے لیکن
اتفاقاً ترے گیسو کی شکن تک پہنچے

مجید امجد

یہ کس حسیں دیار کی ٹھنڈی ہوا چلی
ہر موجۂ خیال پہ صدہا شکن پڑے

مصطفی زیدی

وہی اقرار میں انکار کے لاکھوں پہلو
وہی ہونٹوں پہ تبسم وہی ابرو پہ شکن
اترا تھا جس پہ باب حیا کا ورق ورق
بستر کے ایک ایک شکن کی شریک تھی

احسان دانش

بن بن کے جانے کتنے فنا ہوں گے سومنات
بستے ہیں ہر گلی میں یہاں بت شکن ابھی
گلشن سے پھول چل کے مزاروں تک آ گئے
لیکن ہے باغباں کی جبیں پر شکن ابھی

ادا جعفری

آنکھوں میں روپ صبح کی پہلی کرن سا ہے
احوال جی کا زلفِ شکن در شکن سا ہے

بیخود بدایونی

اک بوند ہے لہو کی مگر بے قرار ہے
دل کو چھپائے زلف شکن در شکن کہاں

علی سردار جعفری

کہاں کا خوف زنداں دہشت دار و رسن کیسی
قد معشوق و زلف پر شکن کی یاد آتی ہے