امام بخش ناسخ

رہتا ہے ہمیں دھیان تمہارا ہی ہمیشہ
تم کو نہیں آتا ہے کبھی دھیان ہمارا

داغ دہلوی

حضرتِ دل آپ ہیں جس دھیان میں
مر گئے لاکھوں اسی ارمان میں
اب یاد ہے اسی کی فریاد ہے اسی کی
سارے جہاں کو جس کا ہم دھیان کر کے بھولے
کعبے کی سمت جا کے مرا دھیان پھر گیا
اس بت کو دیکھتے ہی بس ایمان پھر گیا

مرزا رفیع سودا

جب نظر اس کی آن پڑتی ہے
زندگی تب دھیان پڑتی ہے

یگانہ چنگیزی

کس کی آواز کان میں آئی
دور کی بات دھیان میں آئی
یہ کنارہ چلا کہ ناؤ چلی
کہیے کیا بات دھیان میں آئی

جون ایلیا

دل کہ آتے ہیں جس کو دھیان بہت
خود بھی آتا ہے اپنے دھیان میں کیا
دل کی ہر بات دھیان میں گزری
ساری ہستی گمان میں گزری
اس نے ہم کو گمان میں رکھا
اور پھر کم ہی دھیان میں رکھا

جگر مراد آبادی

سب پہ تو مہربان ہے پیارے
کچھ ہمارا بھی دھیان ہے پیارے

عرفان صدیقی

پکارتا ہے مگر دھیان میں نہیں آتا
عجیب حرف ہے امکان میں نہیں آتا
میں چلا تھا سوچ کے اور کچھ کہ کچھ اور دھیان میں آ گیا
تری خیر شہرِ ستم ہوئی کوئی درمیان میں آ گیا

مجید امجد

جنگ بھی، تیرا دھیان بھی، ہم بھی
سائرن بھی، اذان بھی، ہم بھی

جمال احسانی

جمالؔ پہلی شناسائی کا وہ اک لمحہ
اسے بھی یاد نہ تھا میرے دھیان میں بھی نہ تھا
کسی کے ہونے نہ ہونے کے بارے میں اکثر
اکیلے پن میں بڑے دھیان جایا کرتے ہیں
تیری یاد اور تیرے دھیان میں گزری ہے
ساری زندگی ایک مکان میں گزری ہے

رئیس فروغؔ

اپنا اپنا دھیان سہی
آج یہی اے جان سہی

عالم تاب تشنہ

کس کس سے دوستی ہوئی یہ دھیان میں نہیں
ان میں سے ایک بھی مرے سامان میں نہیں

ثروت حسین

پھر وہ برسات دھیان میں آئی
تب کہیں جان جان میں آئی

افضل منہاس

ایک پیکر یوں چمک اٹھا ہے میرے دھیان میں
کوئی جگنو اڑ رہا ہو جس طرح طوفان میں

احمد فراز

جو کچھ بھی ہوا یہی بہت ہے
تجھ کو بھی رہا ہے دھیان میرا
اپنی ہی آواز کو بے شک کان میں رکھنا
لیکن شہر کی خاموشی بھی دھیان میں رکھنا
اس دریا سے آگے ایک سمندر بھی ہے
اور وہ بے ساحل ہے یہ بھی دھیان میں رکھنا
فاصلے قرب کے شعلوں کو ہوا دیتے ہیں
میں ترے شہر سے دور اور تو مرے دھیان میں ہے

ناصر کاظمی

ایک سے ایک نئی منزل میں
لیے پھرتا ہے ترا دھیان مجھے