مرزا غالب

عشرت قطرہ ہے دریا میں فنا ہو جانا
درد کا حد سے گزرنا ہے دوا ہو جانا
ہے مجھے ابرِ بہاری کا برس کر کھلنا
روتے روتے غمِ فرقت میں فنا ہو جانا
پای ہے جگہ ناصیۂِ بادِ صبا پر
خاکسترِ پروانۂِ جانبازِ فنا ہیں
ڈھونڈے ہے اس مغنی آتش نفس کو جی
جس کی صدا ہو جلوۂِ برقِ فنا مجھے

شیخ ابراہیم ذوق

آبِ خنجر جو ہے زہراب وفاداری کو
پانی شاید کہ سر ملک فنا لگتا ہے

مصحفی غلام ہمدانی

جو حکیم پاس میں جاؤں ہوں تو وہ دوستی سے سنائے ہے
تو معاش کی بھی تلاش کر یہ مقام فقر و فنا نہیں
تو اے مصحفیؔ گر ہے عاشق فنا ہو
کہ عاشق کو بعد از فنا زندگی ہے
یہ آنکھیں ہیں تو ایک دن مصحفیؔ کو
نگاہوں کے اندر فنا کر رہیں گی

یگانہ چنگیزی

اپنی ہستی خود ہم آغوش فنا ہو جائے گی
موجِ دریا آب ساحل آشنا ہو جائے گی

جگر مراد آبادی

یہ کس کی طرف سے یہ کس کی طرف کو
میں ہم دوش موجِ فنا جا رہا ہوں

عرفان صدیقی

چاہتی ہے کہ کہیں مجھ کو بہا کر لے جائے
تم سے بڑھ کر تو مجھے موجِ فنا چاہتی ہے

ضیا جالندھری

نہ رفتگاں ہیں نہ اب یاد رفتگاں باقی
میں کیا ہوں جز رم یک موجۂ فنا کہ میں ہوں

تلوک چند محروم

وہ آئی شامِ غم وقف بلا ہونے کا وقت آیا
تڑپنے لوٹنے کا دم فنا ہونے کا وقت آیا

ثروت حسین

حذر کہ دجلۂ دشوار پر قدم رکھتا
شکارگاہ فرات و فنا کو جاتا ہوں

حسرت موہانی

اس بے نشاں کے ملنے کی حسرتؔ ہوئی امید
آب بقا سے بڑھ کے ہے زہر فنا مجھے
پیرو مسلک تسلیم و رضا ہوتے ہیں
ہم تیری راہِ محبت میں فنا ہوتے ہیں

حفیظ جالندھری

اس دار بقا میں مری صورت کوئی دیکھے
اک دم کا بھروسا ہے جو اک دم میں فنا ہو
حیرت انگیز ہے نقاش ازل کے ہاتھوں
میری تصویر کا تصویر فنا ہو جانا
اے دوست مٹ گیا ہوں فنا ہو گیا ہوں میں
اس دور دوستی کی دوا ہو گیا ہوں میں
قائم کیا ہے میں نے عدم کے وجود کو
دنیا سمجھ رہی ہے فنا ہو گیا ہوں میں

خاطر غزنوی

ہے گماں دیوارِ زنداں کا فصیلِ شہر پر
وہ جو اک شعلہ تھا ہر دل میں فنا کیسے ہوا

سیماب اکبر آبادی

کہتے ہیں جس کو موت ہے اک بے خودی کی نیند
اس کو فنا کہاں ہے جو تجھ پر فنا ہوا

شاد عظیم آبادی

وصل و فراق و حسرت و امید سے کھلا
ہم راہ ہے ہر ایک بقا کے فنا غرض

فانی بدایونی

عشق عشق ہو شاید حسن میں فنا ہو کر
انتہا ہوئی غم کی دل کی ابتدا ہو کر
دل ہمیں ہوا حاصل درد میں فنا ہو کر
عشق کا ہوا آغاز غم کی انتہا ہو کر
محتاج اجل کیوں ہے خود اپنی قضا ہو جا
غیرت ہو تو مرنے سے پہلے ہی فنا ہو جا
قطرہ قطرہ رہتا ہے دریا سے جدا رہ سکنے تک
جو تاب جدائی لا نہ سکے وہ قطرہ فنا ہو جاتا ہے

افضل منہاس

دیکھ لے ساحل سے جی بھر کے مچلتی لہر کو
اس طرف کچھ دیر میں موجِ فنا بھی آئے گی

شاذ تمکنت

اب اس قدر بھی نہ کر جستجوئے آب بقا
گل ہنر ہے تو بادِ فنا بھی راس آئے

فراق گورکھپوری

غفلتیں ہستی فانی کی بتا دیں گی تجھے
جو مرا حال تھا احساس فنا سے پہلے

ناصر کاظمی

اک نیا دور جنم لیتا ہے
ایک تہذیب فنا ہوتی ہے