انشاء اللہ خان انشا

یاس و امید و شادی و غم نے دھوم اٹھائی سینہ میں
خوب مجھے ہے آج دھما دھم مار کٹائی سینہ میں

مومن خان مومن

مر جاتے کیوں نہ صبح کے ہوتے ہی ہجر میں
تکلیف کیسی کیسی اٹھائی تمام شب

جگر مراد آبادی

نقاب حسن دوعالم اٹھائی جاتی ہے
مجھی کو میری تجلی دکھائی جاتی ہے
وہ اک نظر جو بہ مشکل اٹھائی جاتی ہے
وہی نظر رگ و پے میں سمائی جاتی ہے
کیا اٹھائے گی صبا خاک مری اس در سے
یہ قیامت تو خود ان سے بھی اٹھائی نہ گئی

قمر جلالوی

یہی ہوتی ہے شرکتِ بزمِ تماشہ سمجھ کر کھڑے ہو گئے تم
نہ حالات مرنے کے پوچھے کسی سے نہ آنسو بہائے نہ میت اٹھائی

جلیل مانک پوری

ظالم بتوں سے آنکھ لگائی نہ جائے گی
پتھر کی چوٹ دل سے اٹھائی نہ جائے گی
آنکھیں خدا نے دی ہیں تو دیکھیں گے حسنِ یار
کب تک نقابِ رخ سے اٹھائی نہ جائے گی

حسرت موہانی

دل میں کیا کیا ہوسِ دید بڑھائی نہ گئی
روبرو ان کے مگر آنکھ اٹھائی نہ گئی
ہم سے پوچھا نہ گیا نام و نشاں بھی ان کا
جستجو کی کوئی تمہید اٹھائی نہ گئی

شکیل بدایونی

نظر سے قید تعین اٹھائی جاتی ہے
تجلی رخ جاناں دکھائی جاتی ہے

فانی بدایونی

خدا بخیر کرے ضبطِ شوق کا انجام
نقاب میری نظر سے اٹھائی جاتی ہے
اب آ گئے ہو تو اور اک ذرا ٹھہر جاؤ
ابھی ابھی مری میت اٹھائی جاتی ہے
اور کیا کرتے ہم بلا کش غم
جو پڑی دل پہ وہ اٹھائی چوٹ